გათავისუფლებულ ხერსონში განაღმვითი სამუშაოები მიმდინარეობს. ტერიტორიის სრული დეოკუპაციის შემდეგ, მოსახლეობა სოფლებსა და ქალაქებში ეტაპობრივად ბრუნდება, თუმცა მანამდე სამხედროები ტერიტორიის თითოეულ მეტრს ამოწმებენ.
რუსებმა ქალაქებიდან გაქცევის შემდეგ დანაღმეს სახლები, სკვერები და საკანალიზაციო ჭებიც კი. ახლა საოკუპაციო არმია დნეპრის მარცხენა ნაპირზე ცდილობს გამაგრებას.
ხერსონის გათავისუფლებაზე უკრაინის პრეზიდენტმა ვოლოდიმირ ზელენსკიმ თავის ყოველდღიურ მიმართვაშიც ისაუბრა:
“ოკუპანტები ხერსონში მცხოვრებ ჩვენს მოქალაქეებს თვეების განმავლობაში დასცინოდნენ, აბუჩად იგდებდნენ და აჯერებდნენ, რომ ხერსონის სამუდამოდ რუსული იქნებოდა. მიუხედავად მსგავსი მოპყრობისა დღეს ათასობით ადამიანი გამოვიდა და უკრაინულ დროშებს აფრიალებენ. მოქალაქეებს არცერთი წამით უფიქრიათ უკრაინელობა დაეთმოთ.
მთელი მსოფლიო ხედავს, რას ნიშნავს უკრაინელების ერთიანობა. მათ დაინახეს თუ რატომ უნდა გავათავისუფლოთ ჩვენი ტერიტორიები. მსგავსი დახვედრა ბოლო არაა, წინ კიდევ ბევრი ქალაქია, რომელიც უნდა გავათავისუფლოთ, ჩვენ ყველასთან ჩავალთ. აუცილებლად აღვადგენთ საერთაშორისოდ დადგენილ ჩვენს საზღვრებს. ჩვენი სამართალდამცველები უკვე ხერსონში არიან და წესრიგის დამყარებას იწყებენ. ასუფთავებენ ტერიტორიებს. უკვე 2000-ზე მეტი ნაღმი გაანეიტრალეს. ყველაფერს აღვადგენთ. ამას დრო დასჭირდება, თუმცა არცერთი წამი არ გავჩერდებით”, – თქვა ვოლოდიმირ ზელენსკიმ.
9 ნოემბერს რუსეთის თავდაცვის მინისტრმა სერგეი შოიგუმ ხერსონიდან რუსი ჯარის გაყვანის ბრძანება გასცა. 11 ნოემბერს რუსეთის თავდაცვის სამინისტრომ გამოაცხადა, რომ ხერსონის მარჯვენა სანაპიროდან ჯარების გაყვანა დაასრულეს.
რუსეთმა ხერსონი ომის დაწყებიდან მალევე , მარტის თვეში დაიკავა. სექტემბერში კი იქ რუსეთთან მიერთების შესახებ ე.წ. რეფერენდუმიც ჩაატარა.
კომენტარები