უკრაინის პრეზიდენტის პირველი განცხადება ტრამპთან შეხვედრამდე

უკრაინის პრეზიდენტი ვლადიმირ ზელენსკი უკვე ვაშინგტონშია. ამის შესახებ მან საკუთარ ოფიციალურ ტელეგრამ-არხზე დაწერა.

უკვე ვაშინგტონში ვარ. ხვალ შეხვედრა პრეზიდენტ ტრამპთან. ხვალვე ვისაუბრებთ ევროპელ ლიდერებთანაც. მადლობელი ვარ აშშ-ის პრეზიდენტის მოწვევისთვის, – აღნიშნა ზელენსკიმ.

მან აღნიშნა, რომ ყველა სურს ომის დასრულება, მაგრამ „მშვიდობა უნდა იყოს ხანგრძლივი“.

„არა ისე, როგორც ეს წლების წინ მოხდა, როცა უკრაინა აიძულეს გადაეცა ყირიმი და ჩვენი აღმოსავლეთის ნაწილი – დონბასის ნაწილი, ხოლო პუტინმა ეს უბრალოდ ახალი თავდასხმის პლაცდარმად გამოიყენა,“ – განაცხადა პრეზიდენტმა.

ზელენსკიმ ასევე გაიხსენა 1994 წლის „თითქოსდა უსაფრთხოების გარანტიები“, რომლებიც არ გამართლდა.

„არ ღირდა ყირიმის გადაცემა მაშინ, ზუსტად ისე, როგორც 2022 წლის შემდეგ უკრაინელებმა არ ჩააბარეს კიევი, ოდესა, ხარკოვი,“ – აღნიშნა მან.

პრეზიდენტის თქმით, უკრაინელები იბრძვიან საკუთარი მიწისთვის და დამოუკიდებლობისთვის, ხოლო ამჟამად შეიარაღებულ ძალებს წარმატებები აქვთ დონეცკისა და სუმის რეგიონებში. ზელენსკიმ გამოთქვა რწმენა, რომ უკრაინა შეძლებს საკუთარი თავის დაცვას, ეფექტური უსაფრთხოების უზრუნველყოფას და უკრაინელები მადლიერნი იქნებიან პრეზიდენტ ტრამპისა და აშშ-ის მიმართ მხარდაჭერისა და დახმარებისთვის.

რუსეთმა უნდა დაასრულოს ეს ომი, რომელიც თავადვე დაიწყო. და მე იმედი მაქვს, რომ ჩვენი საერთო ძალა ამერიკასთან და ჩვენს ევროპელ მეგობრებთან ერთად რუსეთს აიძულებს ნამდვილ მშვიდობას, – ხაზი გაუსვა ზელენსკიმ.