Novaya gazeta-ს ინფორმაციით, ლარსის საბაჟო გამშვებ პუნქტზე უკვე კვირაზე მეტია უკრაინის 6 მოქალაქე იმყოფება, რომლებსაც ქართველი მესაზღვრეები ქვეყანაში არ უშვებენ.
როგორც გამოცემა წერს, უკრაინის მოქალაქეებმა საზღვრის კვეთა 16-17 აგვისტოს ღამით სცადეს, თუმცა მესაზღვრეებმა უარი უთხრეს.
ადამიანის უფლებადამცველი ორგანიზაციის, Unmode-ის ხელმძღვანელმა გამოცემას უთხრა, რომ სამოქალაქო ტანსაცმელში გადაცმულმა FSB-ს ოფიცრება საზღვარზე მყოფი ერთ-ერთი უკრაინელის გატაცება სცადეს.
“FSB-ს თანამშრომლები სამოქალაქო მანქანით მივიდნენ უკრაინელებთან, ისინი სამოქალაქო ტანსაცმელში იყვნენ გამოწყობილი. ერთ-ერთი უკრაინელის მანქანაში ჩასმა სცადეს, დანარჩენებმა ამის საშუალება არ მისცეს. ქართველი მესაზღვრეები დასახმარებლად მივიდნენ. ახლა უკრაინის მოქალაქეები ტერმინალთან იმალებიან”,- განაცხადა აიდანა ფედოსიკმა.
მედიის ცნობითვე, 40 წლის კაცი, რომლის გატაცებაც FSB-ს თანამშრომლებმა სცადეს, უკრაინის მოქალაქეა, რომელიც ევროპაში ცხოვრობს და იქ ბინადრობის უფლებაც აქვს. ის რუსეთში დის სანახავად იმყოფებოდა, რომელიც კრასნოდარის მხარეში ცხოვრობს.
“მიხეილი რუსეთში ჩასვლისთანავე ზეწოლის ქვეშ მოექცა. მას აეროპორტის დატოვების უფლებას არ აძლევდნენ. სპეცსამსახურებმა ის დაკითხვის ოთახში მოათავსეს, სადაც აიძულებდნენ ხელი მოეწერა ფურცელზე, სადაც ეწერა, რომ ყირიმი რუსეთია”, – თქვა აიდანა ფედოსიკმა.
მას შემდეგ რაც უკრაინის მოქალაქემ ხელმოწერაზე უარი თქვა, ის “ხელისუფლების წარმომადგენლის კანონიერი მოთხოვნების დაუმორჩილებლობის” ბრალდებით პოლიციის განყოფილებაში გადაიყვანეს, სადაც სცემეს და სიტყვიერი შეურაცხყოფაც მიაყენეს.
Unmode-ის ხელმძღვანელის თქმით, ჯგუფთან ერთად მიხეილმა მოახერხა რუსეთის ტერიტორიის დატოვება და საქართველოს საზღვრამდე მისვლა.
კომენტარები