თავიდან გულთბილად დავხვდით, თუმცა ორ თვეში მივხვდით, რომ სააკაშვილი თავის ქართულ გუნდთან ერთად ოდესაში არსებულ კორუფციულ სქემებს მოერგო, – ამის შესახებ უკრაინელმა ბიზნესმენმა სერგეი კრივენკომ „იმედის კვირას“ მიხეილ სააკაშვილზე საუბრისას განუცხადა, რომელიც ის ოდესის გუბერნატორი იყო.
უკრაინელი ბიზნესმენის თქმით, სააკაშვილმა ოდესაში საკუთარ გუნდთან ერთად ყველაფერი სათავისოდ მოიწყო.
„ჩვენ მას თავიდან გულთბილად დავხვდით. გვაინტერესებდა, რას იზამდა საქართველოს ყოფილი პრეზიდენტი. თუმცა, ზუსტად ორ თვეში მივხვდით, რომ ის თავის ქართულ გუნდთან ერთად უბრალოდ, არსებულ კორუფციულ სქემებს მოერგო. მათ ყველაფერი სათავისოდ მოიწყვეს. საიდანაც ფულის შოვნა ვერ მოახერხეს, ის საქმეები უბრალოდ, გააჩერეს.
პირველი მისი საქმე საბაჟო იყო. ადგა და ფასები უაზროდ გაზარდა. ხალხმაც გადაწყვიტა, რომ ტვირთი ოდესის ნაცვლად სხვაგან განებაჟებინა. ფასების აწევასთან ერთად მან უცნაური შავი სქემები შემოიღო, საიდანაც სარგებელს მხოლოდ 5 ადამიანი იღებდა და 5-ვე მისიანი იყო“, – განაცხადა კრივენკომ.
მისივე თქმით, საქმე იქამდე მივიდა, რომ ბიზნესმენებს გაურკვეველ ფონდებში თანხების ჩარიცხვას აიძულებდნენ.
„ბიზნესთან კონტაქტი მის დამხმარეებს ჰქონდათ. საუბრები იქამდე მიდიოდა რომ ბიზნესმენებს გაურკვეველ ფონდებში თანხების ჩარიცხვას აიძულებდნენ. Მიშას მითითებითა და მასთან შეთანხმებით ყველაფერს მისი ხალხი აკეთებდა. მაგალითად, ერთ-ერთ პორტში დღის წესრიგში 10 ჰექტრის გადაცემის საკითხი იდგა. გადაწყვეტილი იყო, რომ ეს მიწა 4 სხვადასხვა ინვესტორისთვის გადაგვეცა. სააკაშვილმა კი ერთპიროვნულად 10-ვე მხოლოდ ერთ-ერთ ინვესტორს, ბახმატიუკს მისცა. სანაცვლოდ თანხა აიღო, რომელიც უკრაინის გარეთ გაურკვეველ ფონდში ჩაირიცხა“, – დასძინა სერგეი კრივენკომ.
კომენტარები