მას შემდეგ, რაც რუსეთის არმია უკრაინაში შეიჭრა, ქალაქების დაბომბვა და ფართომასშტაბიანი ომი დაიწყო, რუსული კლუბები ბევრმა უკრაინელმა (და არა მარტო უკრაინელმა) დატოვა, ანატოლი ტიმოშჩუკს კი ეს ჯერ კიდევ არ გაუკეთებია – ერთ-ერთი ყველაზე ცნობილი უკრაინელი სპორტსმენი დუმს. ყოფილი უკრაინელი ფეხბურთელი ანატოლი ტიმოშჩუკი ამჟამად რუსული კლუბის, ზენიტის, მთავარი მწრთვნელის მოადგილის თანამდებობას იკავებს.
ზენიტში დარჩენის გამო ტიმოშჩუკი არაერთმა უკრაინელმა სპორტსმენმა და პოლიტიკოსმა გააკრიტიკა.
“ტოლია, ასე როგორ შეიძლება? შენ უკრაინელი ხარ. როგორ შეგიძლია, რომ ჩუმად იყო და მანდ მუშაობას აგრძელებდე?” – წერს ტიმოშჩუკისადმი მიძღვნილ ღია წერილში მისი ყოფილი თანაგუნდელი, 44 წლის იევჰენ ლევჩენკო, – “ჩვენ ერთად ვთამაშობდით უკრაინის ნაკრებში, მის ფორმას ამაყად ვატარებდით, ერთად ვმღეროდით ჰიმნს, ერთად ვიგებდით და ვაგებდით. ახლა კი უბრალოდ მშვიდად და ჩუმად ხარ? ტოლია, ასე ცხოვრებას როგორ აპირებ?”
მარიუპოლში სამშობიაროს დაბომბვის შემდეგ ფეხბურთელი ყოფილმა ცოლმა, ნადია ნავროცკაიამაც გააკრიტიკა.
“ტოლიკ, შეხედე, ეს ჩვენი უკრაინელი ბავშვები არიან. ისეთივე ბავშვები, როგორებიც მე და შენ გვყავს! მათ ყოველდღე კლავენ, ის ადამიანები, რომელთაც შენ ახლა ტრ**ს ულოკავ. შენ კლავ ბავშვებს მათთან ერთად. ყოველდღე შენ კლავ უკრაინელ ბავშვებს!
იგივეს გეუბნებოდი 2014-შიც, მაგრამ შენ არჩიე მთელი ეს წლები გეცხოვრა და სიამოვნება მიგეღო, საკუთარი შვილების უბედურების ხარჯზე. შენ იტყუებოდი, ატყუებდი გარშემო ყველას! შენ და მამაშენი ყოველთვის ამბობდით, რომ სამართლიანობის მხარეს ხართ. მართლა გგონია, რომ ჩვენი ბავშვების სიკვდილი სამართლიანია? შენ შეგეძლო გემუშავა მსოფლიოს ნებისმიერ წერტილში! რატომ იხდი ფულს ჩვენი ბავშვების მკვლელობაში!
ოდესაღაც შენ ალქაჯი მიწოდე. იცოდე, გისურვებ ცხოვრების ბოლომდე გესიზმრებოდნენ ბავშვები, რომლებიც ამ ომში იღუპებიან”. – წერს სოციალურ ქსელში ნავროცკაია.
სოციალურ ქსელში გამოქვეყნებულ გრძელ პოსტს თანდართული აქვს დაბომბილი სამშობიაროს ფოტოები.
კომენტარები