უკრაინაზე რეზოლუციის იდეა სიტუაციის შეუსაბამოა – გიორგი კანდელაკი

„ევროპული საქართველოს“ წევრი გიორგი კანდელაკი აცხადებს, რომ საპარლამენტო ოპოზიციის მიერ უკრაინის მხარდამჭერი რეზოლუციის მიღების მოთხოვნა „უბრალოდ ორთქლის გამოშვება და ფუჭია“.

მისი თქმით, ოპოზიციამ  „ქართულ ოცნებას“ მუშაობის იმიტაციის საშუალება არ უნდა მისცეს.

როგორც კანდელაკი ამბობს, საქართველოს მხოლოდ უმაღლეს აღმასრულებელ დონეზე მოქმედება სჭირდება.

„დღეს ვითარება უკრაინის ირგვლივ არის იმდენად სერიოზული და მძიმე, რომ ერთადერთი რამ, რაც პრაგმაატულად სჭირდება საქართველოს, მის ეროვნულ და უსაფრთხოების ინტერესებს, არის მხოლოდ უკრაინასთან უმაღლეს აღმასრულებელ დონეზე ერთ გუნდად მოქმედება საერთაშორისო ასპარეზზე, რაც გულისხმობს პირველ რიგში პრემიერმინისტრის ჩასვლას კიევში”, – განაცხადა კანდელაკმა და დასძინა, რომ საჭიროა საქრთველოს პრობლემების აქტუალიზაცია დასავლეთის მაღლი დონის პოლიტიკური დონის დღის წესრიგში.

“აქედან გამომდინარე, ის რეზოლუციის იდეა, რომელიც წამოაყენა საპარლამენტო ოპოზიციამ და ახლა არც ვეხები პარლამენტის ლეგიტიმურობის ძალიან მნიშვნელოვან საკითხს, შემქნილი ვითარებიდან გამომდინარე, ვითარების სიმძიმიდან გამომდინარე, არის სიტუაციის შეუსაბამო, არაადეკვატური და იქნებოდა უბრალოდ ორთქლის გამოშვება და ფუჭი. არ უნდა მივცეთ საშუალება ოცნებას, რომ მოახდინოს მუშაობის იმიტაცია, რაც მას არაერთხელ გაუკეთებია წარსულში“, – განაცხადა კანდელაკმა.

საპარლამენტო ოპოზიცია უმრავლესობას მოუწოდებს, უკრაინის მხარდამჭერი რეზოლუცია ერთობლივად მიიღონ. ამის შესახებ ოპოზიციამ დღეს, 24 იანვარს, პარლამენტში ბრიფინგი გამართა.