დღეს ცნობილი გახდა, რომ ჟურნალისტი ეკა ხოფერია აფხაზეთის ავტონომიური რესპუბლიკის განათლებისა და კულტურის მინისტრად დაინიშნა.
“ეს სამინისტრო აერთიანებს ძალიან ბევრ მნიშვნელოვან მიმართულებას განათლებისა და კულტურის, მეცნიერების, სპორტის მიმართულებას. ამავდროულად ისტორიულ მემკვირდეობას აფხაზეთში, ეს თემა ძალიან მნიშვნელოვნად წამოსაწევი იქნება. დღეს არის ჩემი პირველი სამუშაო დღე”, – ამბობს ეკა ხოფერია.
სამწუხაროდ, ეს სამინისტრო უკვე წლებია აღარ აერთიანებს განათლებას, კულტურას, სპორტის მიმართულებას და არც ქართულ, თუ აფხაზურ მემკვიდრეობებს, ალბათ, არ იცის, ახალმა მინისტრმა, რომ საკითხები, რომლებიც ჩამოთვალა, დიდი ხანია დავიწყებასაა მიცემული და მასზე პასუხისმგებლობას ხან რომელ სამინისტროს მიუგდებენ და ხან რომელს, ისე რომ ბოლოს ვერ გაიგებ, პასუხი ვისგან მიიღო.
დღეს მინისტრ ეკა ხოფერიას პირველი სამუშაო დღეა, წარმატებებს ვუსურვებთ და პირადად მას, “ალიასგან” პირველი სამუშაო თემა, რომელიც ჩააგდო მთავრობამ და სამინისტროებმა, თემა, რომელიც პირდაპირ მის სამინისტროს ეხება, თემა, რომელსაც სერიოზული ძვრები შეიძლებოდა მოჰყოლოდა და მოჰყვებს.
რამდენიმე თვის წინ, “ალიაში” დაიბეჭდა ლაშა ამირეჯიბის ინტერვიუ (ავტორი: ჟურნალისტი ლევან ჯავახიშვილი), ამ ინტერვიუში ის გვიყვება, როგორი მნიშვნელოვანი პროექტი ჩააგდო საქართველოს მთავრობამ:
“ერთი ამბავი მინდა გითხრა. ჩემს ოჯახს უნდოდა აფხაზებისთვის „დათა თუთაშხია“ ეჩუქებინა, ცხადია. აფხაზურ ენაზე თარგმნილი. უკვე ნათარგმნია აფხაზურად, ცოტა დახვეწა სჭირდება. მოკლედ, აფხაზურად უნდა დაგვებეჭდა „დათა თუთაშხია“, რომ რაულ ხაჯიმბამ შემომითვალა, გალის ზონის ქართველებისთვის ქართლად დაბეჭდეთო, ეს აუცილებლად გაითვალისწინეთო. ეს ხომ იყო დასაფასებელი ჟესტი? ცხადია, იყო. სერიოზული გეგმა იყო. სახალხო დიპლომატია მეტი რა არის? სოხუმში უნდა ჩავსულიყავით მე, ქეთი დუმბაძე, მერაბ რატიშვილი, დათო მაღრაძე… ერთი–ორი ბიზნესმენი.. სოხუმის უნივერსიტეტში უნდა გაგვემართა შეხვედრა სტუდენტებთან. დაგვპირდნენ, რომ ამას მიგვიწყობდნენ. იქაურ ინტელიგენციასთან შეხვედრაც იყო დაგეგმილი. მერე უნდა დაგვერიგებინა წიგნები, მარტო სოხუმში არა, რაიონებშიც. იხვეწებოდა ხაჯიმბა, დააჩქარეთო. 50 000 დოლარი ჯდებოდა წიგნის ორ ენაზე ბეჭდვა და აფხაზურად ხელახლა თარგმნა. ეს თანხა არ მოგვცა ამ ხელისუფლებამ. ქეთევან ციხელაშვილს გადააბარეს მერე ეს საქმე და ციხელაშვილმა მითხრა, ფული არ მაქვს, უნდა მოვიპოვოთ, ვიშოვნოთ, გაერო–ს უნდა ვთხოვოთ… მას არ ვერჩი, მართლა არ ჰქონდა ფული. ვინც ამ მცირებიუჯეტიან სამინისტროს დაავალა დაფინანსება, ის არის დამნაშავე. ბოლოს, ოღონდ ეს საქმე არ ჩაშლილიყო, თანახმა ვიყავი, 50 000 ლარი რასაც გასწვდებოდა, იმდენი ეგზემპლარი დაგვებეჭდა და არც ეს მომცეს. 2 წლის წინანდელი ამბავია. იცი, რა დონეზე იყო ეს საქმე?
ხაჯიმბასგან გამოგზავნილი კაცი შეხვდა პრემიერ გიორგი კვირიკაშვილს და უთხრა, 4 მესიჯი მაქვს ხაჯიმბასგან და ერთი „დათა თუთაშხიას“ აფხაზეთში დარიგებაა, ხაჯინბამ იკითხა, როდის იწყებთ წიგნის ბეჭდვასო? არადა, ყველა სახელმწიფო სტრუქტურაში პიარის ხარჯები გაზარდეს, არაფერს აკეთებენ და ფულს იღებს ხალხი. ზოგი სამსახურში საერთოდ არ დადის, ვიღაცის ვიღაცაა და თვეში ერთხელ სოლიდურ ხელფასს ჩუქნიან, პენსიასავით. ამხელა საქმისთვის 50 000 ლარი ვერ გამონახეს. ამას გაგრძელება მოჰყვებოდა, რომელიმე თეატრი სპექტაკლს ჩაიტანდა, ცეკვის ანსამბლი ჩავიდოდა, ერთობლივი სპორტული ღონისძიებები გაიმართებოდა, მერე აფხაზები ჩამოვიდოდნენ. მედია გააშუქებდა ამ ყველაფერს. ყინული გალღვებოდა, საქმე დაიძრებოდა, მაგრამ ამხელა საქმისთვის არც 50 000 დოლარი, არც 50 000 ლარი არ აღმოჩნდა სახელმწიფოს. 50 000 ლარს ბიძინა ივანიშვილის დეიდაშვილი, უჩა მამაცაშვილი ერთ სადილში ხარჯავს.”
ალია
კომენტარები