დონალდ ტრამპმა განაცხადა, რომ რუსეთის პრეზიდენტ ვლადიმერ პუტინთან სატელეფონო საუბრისას, უკრაინაში მიმდინარე ომთან დაკავშირებით, კონკრეტულ წინსვლას ვერ მიაღწია.
„არა, დღეს მასთან არანაირი პროგრესი არ მქონია. გვქონდა საკმაოდ ხანგრძლივი სატელეფონო საუბარი — ვისაუბრეთ სხვადასხვა თემაზე, მათ შორის ირანზე და უკრაინის ომზეც. უნდა გითხრათ, შედეგით კმაყოფილი არ ვარ“, — აღნიშნა ტრამპმა ჟურნალისტებთან საუბარში.
საუბრისას ტრამპს ჰკითხეს, შეაჩერა თუ არა აშშ-მა უკრაინისთვის იარაღისა და საბრძოლო მასალის მიწოდება, რაზეც მან აღნიშნა, რომ მიწოდება გრძელდება.
„არ შეგვიჩერებია. ჩვენ კვლავ ვაწვდით იარაღს, ბევრი იარაღი უკვე მივაწოდეთ. ვაგრძელებთ თანამშრომლობას და ვცდილობთ, დავეხმაროთ უკრაინას. თუმცა, არ დაგავიწყდეთ — ბაიდენის ადმინისტრაციამ პრაქტიკულად გააცარიელა ჩვენი ქვეყანა იარაღით მხარდაჭერის ფონზე, და ახლა უნდა დავრწმუნდეთ, რომ საკმარისი მარაგი გვაქვს საკუთარი თავდაცვისთვისაც“, — განაცხადა ტრამპმა.
კომენტარები