თუ ევროპული მხარე იტყვის, ბრიუსელშიც ჩავალთ და შარლ მიშელსაც შევხვდებით – გიორგი ვაშაძე

„სტრატეგია აღმაშენებლის“ ლიდერი, გიორგი ვაშაძე აცხადებს, რომ ევროპული მხარის სურვილზეა დამოკიდებული, იქნება თუ არა ოპოზიცია წარმოდგენილი ბრიუსელში, ევროპელ პარტნიორებთან შეხვედრაზე.

„თუ შეთანხმებისკენ რაიმე ნაბიჯი არ გადაიდგა, არც შარლ მიშელს არ ექნება შეხვედრის სურვილი და ძალით ვერ ჩავალთ და ვერ ვიტყვით, გინდათ თუ არა, შეგვხვდითო. ამიტომ, ყველაფერი დამოკიდებულია დღევანდელ დღეზე ვხედავთ შეთანხმების ნათელ მომავალს თუ ვერა. აქედან გამომდინარე, თუ ევროპული მხარე იტყვის, ბრიუსელშიც ჩავალთ და შარლ მიშელსაც შევხვდებით“ – აცხადებს გიორგი ვაშაძე.

შეგახსენებთ, ევროპული საბჭოს პრეზიდენტის, შარლ მიშელის პირადი წარმომადგენელი დღეს უკვე მესამე შეხვედრას მართავს.

„ქართული ოცნების“, „ნაციონალური მოძრაობისა“ და „რესპუბლიკური პარტიის“ წარმომადგენლების შემდეგ, კრისტიან დანიელსონი „ევროპული საქართველოს“,„სტრატეგია აღმაშენებლს“, „ლელოსა“ და „გირჩი – მეტი თავისუფლების“ ლიდერებს ხვდება.ევროპის საბჭოს პრეზიდენტის, შარლ მიშელის პირადი წარმომადგენელი კრისტიან დანიელსონი საქართველოს 12 მარტს ეწვია. ის ხელსიუფლებისა ოპოზიციის წარმომადგენლებს შორის შეხვედრას მართავს და მთავარ პოლიტიკურ პროცესში მედიატორის როლს ასრულებს.