“თქვენთვის რომ დაგვეჯერებინა და ეს სისულელე გაგვეკეთებინა, დაგვეწესებინა ეროვნული დონის სანქციები რუსეთზე…” – ღარიბაშვილი ოპოზიციას

 პრემიერმა, ირაკლი ღარიბაშვილმა, რომელსაც პარლამენტში ინტერპელაციის წესით უსმენენ, ოპოზიციის მისამართით თქვა:

“რომ გვიკიჟინებდით და მოგვიწოდებდით, დაუწესეთ ეკონომიკური და ფინანსური სანქციები რუსეთსო, მინდა გკითხოთ, წარმოდგენა თუ გაქვთ საერთოდ, რომ 1 მილიონი ჩვენი მოქალაქე ცხოვრობს რუსეთში. გვაქვს სავაჭრო-ეკონომიკური ურთიერთობები, ჩვენი ქვეყანა არის დროებით ოკუპირებული და რუსული ჯარი დგას ჩვენს ტერიტორიებზე. ამ ფონზე, მით უმეტეს, კარგად მოგეხსენებათ, რომ ეროვნული ეკონომიკური სანქციების დაწესება რუსეთის ფედერაციაზე, რა თქმა უნდა ნიშნავდა იმას, რომ ჩვენ საკუთარ მოქალაქეებს დავუწესებდით სანქციებს, ჩვენს ქვეყანას დავუწესებდით სანქციებს. აქედან გამომდინარე, მიუხედავად ჩვენი სოლიდარობის უკრაინის მიმართ, ვთქვით, რომ ვიხელმძღვანელებთ ეროვნული ინტერესების გათვალისწინებით მხოლოდ და ამ გადაწყვეტილებას ვერ შეგვაცვლევინებს ვერავინ. თქვენ ალბათ არ იცით, მაგრამ დღეს მსოფლიოში არის ურთულესი ვითარება. მსოფლიო ეკონომიკის რეცესია არის მოსალოდნელი, ინფლაცია ზოგიერთ ქვეყანაში 20%-ს გადასცდა, აღარ მაქვს საუბარი ეკონომიკურ ზრდაზე და ამ პირობებში, ჩვენ ვინარჩუნებთ ერთ-ერთ ყველაზე მაღალ ეკონომიკურ ზრდას. ეროვნული ვალუტა განაგრძობს გამყარებას, იზრდება ტურიზმი, ექსპორტი. ყველა მიმართულებით გვაქვს პროგრესი. ახლა გეკითხებით, ორი თვის წინ თქვენთვის რომ დაგვეჯერებინა და ეს სისულელე გაგვეკეთებინა, დაგვეწესებინა ეროვნული დონის სანქციები რუსეთზე, რა მდგომარეობაში ვიქნებოდით ჩვენ დღეს თუ გაქვთ ამაზე წარმოდგენა და პასუხი მოქალაქეებისთვის?!”