ალკოჰოლის არალეგალური წარმოების ბრალდებით დაკავებულ ვეტერან მოკრივეს, გორელ ბიზნესმენ გიორგი კანდელაკს ბრალდება წარუდგინეს. ინფორმაცია ბრალდებულის ადვოკატმა, გაგი მოსიაშვილმა დაადასტურა.
როგორც უფლებადამცველმა განაცხადა, ბრალის დადგენილების გაცნობის შემდეგ, მათთვის კვლავ უცნობია, რაში მდგომარეობს ბიზნესმენის ბრალეულობა.
ადვოკატი ხაზგასმით აღნიშნავს, რომ შენობა, სადაც გამოძიების მტკიცებით, კანონსაწინააღმდეგო საქმიანობა ხდებოდა, გიორგი კანდელაკს არ ეკუთვნის.
ინფორმაციას, რომელსაც ასე ავრცელებს საგამოძიებო უწყება იქნება თუ მედიასაშუალებები, თამამად შემიძლია გითხრათ, რომ არის არასწორი, საზოგადოების შეცდომაში შეყვანის მცდელობა და ა.შ.
გიორგი კანდელაკს არათუ ამ საქმესთან, ამ ქარხანასთან, ბრალში დასახელებულ კომპანიებთან არანაირი კავშირი არ გააჩნია”- თქვა ადვოკატმა.
კითხაზე, აქვს თუ არა მეგობრული ურთიერთობა კანდელაკს, ასევე დაკავებულ გორის საკრებულოს წევრ ბორია გოგიჩაიშვილთან, [დოკუმენტების თანახმად, საწარმო, სადაც სპეცოპერრაცია ჩატარდა, “ქართული ოცნების” წევრს ეკუთვბის] უფლებადამცველი ამბობს:
პირობითად, თქვენმა მეგობარმა რამე რომ დააშავოს, თქვენ პასუხისმგებლობა უნდა დაგეკისროთ?! კიდევ ერთხელ განვმარტავ: ე.წ. ქარხანა, კონკრეტული ტერიტორია, ამ ე.წ. იატაკქვეშა ბიზნესთან, როგორც ეს მედიამ მონათლა, გიორგი კანდელაკს შემხებლობა არ აქვს. მას შემდეგ რაც მასალებს მივიღებთ, საზოგადოება ობიეტქურ ინფორმაციას მიიღებს”- აღნიშნა ადვოკატმა.
ფინანსთა სამინისტროს საგამოძიებო სამსახურმა 17 სექტემბრის დილას გაავრცელა ინფორმაცია 7 ადამიანის დაკავების შესახებ. გამოძიების ინფორმაციით, დაკავებულები გორში მოქმედ არალეგალურ სასმელების ქარხანასთან არიან დაკავშირებული, სადაც კუსტარულად აწარმოებდნენ ბრენდული სასმელების ფალსიფიკაციას.
სამართალდამცავებმა უაქციზო სიგარეტების საწყობიც აღმოაჩინეს.
დაკავებულებს შორის არის გორელი ბიზნესმენი და მოკრივე, გიორგი კანდელაკი.
დაკავებულია ბიზნესმენ გიორგი ჯალაბაძის ძმა, ქართლოს ჯალაბაძე და გორის საკრებულოს წევრი “ქართული ოცნებიდან” ბორის გოგიჩაიშვილი.
კომენტარები