„თმა გასცვივდა, ყბები ჩამოვარდნილი აქვს, კანი აქვს გადაკრული ძვლებზე, საკონცენტრაციო ბანაკებში ჩონჩხადქცეული პატიმრების სურათები ხომ გინახავთ, ზუსტად იმგვარად გამოიყურება!“ – ვალერი გელბახიანი სააკაშვილზე

ლევან ჯავახიშვილი

„ალიას“ ესაუბრება ადოკატი, ვალერი გელბახიანი.

–  შეიძლება პრეზიდენტმა მიშა სააკაშვილიც შეიწყალოს?

– ახლა უკვე აღარაფერია გამორიცხული. მიშა უფრო საშიშია ხელისუფლებისთვის, ვიდრე გვარამია, ამას ბევრი ლაპარაკი არ უნდა. მიშა ჯანმრთელი იქნება თუ ავადმყოფი,  ქართული პოლიტიკისთვის მნიშვნელობა არ აქვს, მასში მისი  მონაწილეობისთვის, ეს ფაქტორი  გადამწყვეტი არ არის.  მიშა არ გეგმავს, რომ საქართველოში რაიმე თანამდებოდა დაიკავოს, მისი სამოქმედო არეალია უკრაინა. თუმცა ვიდრე დაიჭერდნენ, უკრაინიდან აქტიურად იყო ჩართული ქართულ პოლიტიკაში. ახლა, როდესაც ჩაკეტეს, აღარ უშვებენ უცხოეთში სამკურნალოდ, ჩონჩხს ჰგავს, 61 კილოა და აქედან გამომდინარე, სხვა აღარაფერი დარჩენია, გარდა იმისა, განაცხადოს, რომ ვიღებ საქართველოში პოლიტიკურ პროცესებში მონაწილეობასო.  ეს არის მისი იძულებითი სვლა. „ქართული ოცნების“ რამდენიმე ლიდერი გამოვიდა და განაცხადა, სააკაშვილი საქართველოს მოქალაქე არ არის და აბსურდია მისი პოლიტიკაში დაბრუნებაო. რანაირად არის აბსურდი? პოლიტიკაში ჩართვა მაინც და მაინც პარლამენტის დეპუტატობას, მინისტრობას და პრემიერ–მინისტრობას არ ნიშნავს. სალომე ზურაბიშვილი საგარეო  საქმეთა მინისტრი როცა გახდა, საფრანგეთის მოქალაქე იყო  და ბიძინა ივანიშვილი ისე გახდა პრემიერ–მინისტრი, საქართველოს მოქალაქე არ იყო, ისიც  საფრანგეთის მოქალაქე იყო. თავიანთ თავს ეწინააღმდეგებიან. მერე მეორე – მიშა არანაირი პოსტის დაკავებას არ აპირებს, აქ საუბარია იმაზე, რომ მიშა პოლიტიკურ პროცესებს ჩაუდგეს სათავეში, გააერთიანოს ქართული პოლიტიკური სპექტრი, რათა ამ ერთობით შეიცვალოს ხელისუფლება. თავად მიხეილ სააკაშვილი, ვვარაუდობ, რომ  გააკეთებს ასეთი ტიპის განცხდებას, რომ მას საქართველოს სახელმწიფო სტრუქტურებში არასოდეს არ ექნება რაიმე თანამდებობის დაკავების პრეტენზია.

– შესაძლოა, ისე განვითარდეს საქართველოში პოლიტიკური პროცესები, ამოვარდეს სტანდარტული კალაპოტიდან და  რეცოლუციური პროცესები დაიწყოს…

– ეგ შესაძლებელია მართლა  მოხდეს და  ასეთ დროს, რა მიშას მოქალაქეობაზეა ლაპარაკი? რევოლუციურ პროცესს რომელი ქვეყნის მოქალაქის სტატუსით შეუერთდება თუ ჩაუდგება სათავეში, რა მნიშვნელობ აქვს? მიშა უფრო დიდი საფრთხეა ამ ხელისუფლებისთვის, ვიდრე გვარამია. მიშას ჩატოვება ციხეში ნიშნავს, რომ რევოლუცია სახეზეა. ამიტომ, ერთადერთი ვარიანტი აქვს ხელისუფლებას, რომ მიშა უცხოეთში გაუშვან სამკურნალოდ. ამათ სხვა გზა აღარ დაიტოვეს.

– მე მგონი, ახლა მართლა იძულებულნი გახდნენ, სააკაშვილი უცხოეთში გაუშვან  სამურნალოდ, ვიდრე სალომე ზურაბიშვილმა შეიწყალოს. ნიკა გვარამიას შეწყალებამ ეს ვარიანტი დააჩქარა, ასეა?

– რა თქმა უნდა, სალომეს კიდევ არ დააწერინებენ ქულებს. ახლა ევროპის სამედიცინო კომისია მოდის, ევროსაბჭოს  მინისტრთა კომიტეტმა მიიღო ეს გადაწყვეტილება – ჩამოვლენ და მიშას სამედიცინო დასკვნას დასწერენ ისინი. რად უნდა დასკვნა? რატომ არ მიიყვანეს მიშა მისსავე სასამართლო პროცესზე? იმიტომ, რომ მიშა არ ენახა ხალხს. 61 კილოა, თმა გასცვივდა, ყბები ჩამოვარდნილი აქვს, კანი აქვს გადაკრული ძვლებზე. საკონცენტრაციო ბანაკებში ჩონჩადქეული პატიმრების სურათები და ფილმები  ხომ გინახავთ, არა?! ზუსტად იმგვარად გამოიყურება, ეგღაა დარჩენილი მიშასგან. ამას რომ ადამიანი ნახავს, რაღად უნდა იმას დასკვნა. აქ კიდევ პროპაგანდა მიდის, მიშა იგონებდა, არ სჭირდა ის და იმდენი დაავადებები, რასაც ამბობდნენ მისი ადვოკატები და უცხოელი ექსპერტებიო. გვაჩვენონ მიშა და მერე ვნახოთ, ვინ იტყუება. ჯანმრთელი კაცი როგორ შეიძლება ჩონჩხად იქცეს? ე.ი. ავად არის და თან რამდენმე დაავადება სჭირს, ასეთ დღეში რომ არის.