აშშ-ის პრეზიდენტი ჯო ბაიდენი მხარს უჭერს ნებისმიერ ქვეყანას, რომელიც მიისწრაფვის ნატოს წევრობისკენ, – ამის შესახებ ჟურნალისტებს თეთრი სახლის პრესმდივანმა, ჯენ ფსაკიმ განუცხადა.
„აშშ-ის პრეზიდენტი მხარს უჭერს ნებისმიერ ქვეყანას, რომელიც მიისწრაფვის უსაფრთხოების ალიანსებში გაწევრიანებისკენ – ნატოსა და სხვა ალიანსებშიც. ის ასევე უჭერს მხარს უკრაინის მისწრაფებას. ცხადია, არსებობს გარკვეული კრიტერიუმები, რომელთა დაკმაყოფილებაც მათ მოუწევთ სხვადასხვა საკითხში, მათ შორის კორუფციის კუთხით, და ასევე ცხადია, რომ ნატოს პარტნიორების და ალიანსის გადასაწყვეტია, როგორი იქნება ეს გზა“, – განაცხადა ფსაკიმ.
მისივე თქმით, ბაიდენი ტელეფონით ესაუბრა უკრაინელ კოლეგას ვოლოდიმირ ზელენსკის და დაადასტურა უკრაინის ტერიტორიული მთლიანობის მხარდაჭერა. მან ასევე გააცნო ზელენსკის რუსეთის პრეზიდენტთან, ვლადიმერ პუტინთან გამართული მოლაპარაკებების შედეგები.
„ბაიდენმა განაცხადა, რომ შეშფოთებულია რუსეთის სამხედროების კონცენტრაციით უკრაინის საზღვრებთან და მზადაა ხისტი ზომების დაწესებისთვის, თუ რუსეთი სამხედრო ესკალაციას მოახდენს“, – განაცხადა ფსაკიმ.
8 დეკემბერს, აშშ-ის პრეზიდენტმა, ჯო ბაიდენმა განაცხადა, რომ აშშ უკრაინაში ჯარების გაგზავნის საკითხს არ განიხილავს.
„ნატოს წესდების მე-5 მუხლის თანახმად, ჩვენ მორალური და სამართლებრივი ვალდებულება ნატოს მოკავშირეების წინაშე გვაქვს, თუ მათ თავს დაესხმებიან. ეს წმინდა ვალდებულებაა. ეს ვალდებულება უკრაინაზე არ ვრცელდება“, – აღნიშნა აშშ-ის პრეზიდენტმა.
გარდა ამისა, ჯო ბაიდენმა განაცხადა, რომ ის მოელის, რომ 10 დეკემბრისთვის აშშ და ნატოს, სულ მცირე, ოთხი მოკავშირე და რუსეთი მაღალი დონის შეხვედრების გამოცხადებას შეძლებენ, რათა ნატოსთან დაკავშირებით რუსეთის შეშფოთება განიხილონ.
კომენტარები