მთიან ყარაბაღში 32 წლის წინ დაწყებული პირველი კონფლიქტი, რომელიც 1994 წელს ზავის დადებით დასრულდა, 2020 წლის 27 სექტემბერს განახლდა და 44-დღიანი ომი 10 ნოემბერს რუსეთის ფედერაციის მეთაურობით აზერბაიჯანის და სომხეთის პირველ პირებს შორის დადებული შეთანხმებით დასრულდა.
სოციალურ ქსელში ვრცელდება ცნობები იმის შესახებ, რომ ქელბაჯერის უკმაყოფილო სომეხი მოსახლეობა სახლებს, ტყეებს წვავს. მეტიც, სოციალურ ქსელში ვრცელდება ფოტოები, რომლებზეც ჩანს, რომ ზოგმა წინაპართა საფლავებიც გათხარა და მიცვალებულთა ნეშტი გადაიტანა. მოსახლეობას ქელბაჯერიდან მიწაც მიაქვთ.
სომხური მედიის ინფორმაციით, ხალხი ფაქტობრივად ანადგურებს ყველაფერს, მათ შორის სახლებს, მაღაზიებს, ასევე მიაქვთ ის რისი წაღებაც შეუძლიათ.
ცნობისთვის, 10 ნოემბერს მთიან ყარაბაღში ცეცხლის შეწყვეტის შესახებ შეთანხმების 9-პუნქტიან გეგმას რუსეთის პრეზიდენტმა ვლადიმერ პუტინმა, აზერბაიჯანის პრეზიდენტმა ილჰამ ალიევმა და სომხეთის პრემიერ-მინისტრმა ნიკოლ ფაშინიანმა მოაწერეს ხელი. ილჰამ ალიევმა აზერბაიჯანის მოსახლეობას დიდი გამარჯვება მიულოცა.
კომენტარები