მიხეილ სააკაშვილი ციხიდან წერილს აქვეყნებს:
,,ჩვენი ბავშვები მიდიან სკოლაში, სკოლას კი გაუჩნდა ძალიან ბევრი პრობლემა და მათი რიცხვი იზრდება. თავის დროზე ჩვენს მიერ მანდატურების ინსტიტუტის შემოღებამ სკოლაში დაასრულა კრიმინალების ათწლეულებიანი თარეში და მისცა ბავშვებს საშუალება ესწავლათ უსაფრთხო გარემოში.
ქოცებმა მანდატურების უფლებები მკვეთრად შეზღუდეს, “დააჩმორეს” ის და სკოლაში ისევ დაბრუნდა გარჩევები, ფულის წართმევა და კრიმინალი.
არანაკლებ საგანგაშოა სკოლაში კორუფციის დაბრუნება. საქმე იმაშია რომ ჩემს საბჭოთა ბავშვობაში და მითუმეტეს შევარდნაძის 90-იანებში, სკოლებში იყო მუდმივი ფულის შეკრება და ზოგადი კორუფცია, შემდეგ ჩვენ კორუფცია მთლიანად ამოვძირკვეთ. ახლა ისევ დაიწყო ყველაფერზე ფულის აკრეფა – მასწავლებლების დაბადების დღეზე, 8 მარტზე, ფარდების ყიდვაზე, ნუ რეპეტიტორობაზე თავისთავად. ბავშვებს აჩვევენ, რომ აღებ-მიცემობა ჩვეულებრივი ამბავია, რაც მენტალურ კატასტროფას მოასწავებს.
ძველი ჩვევების დაბრუნებას, თან დაერთო ივანიშვილის ნოსტალგიით განპირობებული სკოლის ფორმების შემოღება (ტიპს “საბჭოთა ვოლგა” მოსწონს და ფორმა რატო არ მოეწონება). შესაბამისად ამ ფორმების ტენდერებზეც რა თქმა უნდა სრულად არის წარმოდგენილი ქოცური კორუფცია. ფორმის ამოცანაა ინდივიდუალიზმის და თავისუფლების შეზღუდვა, ყველას ჩარჩოებში ჩასმა. მე პირადად სკოლის მთელი პერიოდი მეზიზღებოდა ჩემი ფორმა, მიუხედავად იმისა, რომ ყოველთვის საუკეთესო მოსწავლე ვიყავი. როგორც კი მოვიშორებთ ამათ, ფორმებიც გაუქმდება. დარწმუნებული ვარ ეს მოხდება ძალიან მალე.“
კომენტარები