თბილისის ცენტრში მოკლული 24 წლის მამუკა ლომიძის ოჯახი ობიექტურ გამოძიებას ითხოვს. დედას, რომელიც შვილის მკვლელობის დროს ემიგრაციაში იმყოფებოდა, სურს რომ გაეცნოს საქმის მასალებს და სრული სიმკაცრით დაისაჯოს დამნაშავე.
“სიმწრით გაზრდილი შვილი მომიკლა, ყველაზე უმაღლესი რაც არის, ხო არის 109-ე მუხლი, უვადო, უვადო ეკუთვნის. არ ვიცნობთ ვინ არის, არ ვიცი და ნეტა ჩემმა შვილმა სად გაიცნო, ან სად ნახა. არავის არ დაურეკია, არავინ არ მოსულა, ველოდები რას იზამენ” – ამბობს მოკლულის დედა “მთავარ არხთან” საუბარში.
შეგახსენებთ, მკვლელობა თბილისში 18 თებერვალს, ალექსანდრე ჭავჭავაძის ქუჩაზე მოხდა. 24 წლის ახალგაზრდა ცეცხლსასროლი იარაღიდან რამდენიმე გასროლით მოკლეს. დანაშაულს კი წინ ერთ-ერთ კლუბში დაწყებული ჩხუბი უძღოდა. დაკავებულია ორი პირი – მკვლელობაში ბრალდებული ბაჩო სირაძე და გრიგოლ ზარნაძე, რომელსაც ბრალად ედება გამოძიებისთვის ცრუ ჩვენების მიცემა. ორივე მათგანს წინასწარი პატიმრობა აქვს შეფარდებული.
კომენტარები