ყვარლის მუნიციპალიტეტის სოფელ შილდას ტყეში ხანძრის ჩაქრობა ამ დრომდე ვერ ხერხდება. დაკვამლიანების შედეგად შექმნილი რთული ვითარების გამო, ცეცხლის ქრობის პროცესში ავიაცია მოგვიანებით ჩაერთო.
გარდა ამისა, “მთავარი არხისთვის” ცნობილი ხდება, რომ სტიქიის ადგილზე ახალი კერები ჩნდება.
ადგილზე მობილიზებულია ცოცხალი ძალა, მათი რაოდენობა 800-მდე გაიზარდა. ასევე იმყოფებიან თავდაცვის სამინისტროს ეროვნული გვარდიის რეზერვის თანამშრომლები, მეხანძრე-მაშველები და ადგილობრივი მოხალისეები.
შინაგა საქმეთა სამინისტროს ოფიციალური წარმომადგენლების თქმით, ადგილზე გარკვეული გზის მონაკვეთი გაჭრილია და მიყვანილია შესაბამისი ტექნიკა, პარალელურად კი გზის გაყვანის სამუშაოები ისევ მიმდინარეობს.
“ხანძრის კერებამდე მოხერხდა წყლის მიყვანა, ასევე მძიმე ტექნიკის საშუალებით მიმდინარეობს გზების გაჭრა. ხანძრის ქრობით სამუშაოებში მეხანძრე-მაშველებთან ერთად ჩართულია ეროვნული გვარდია, ასევე სასაზღვრო პოლიციის ავიაცია და ყველა შესაბამისი სამსახური”, – თქვა საგანგებო სიტუაციების მართვის სამსახურის წარმომადგენელმა.ხანძარი შილდის ტყეში ორი დღის წინ გაჩნდა. ცეცხლი ტყის ქვედა საფარზე ფოთლებს გაუჩნდა. რა გახდა ხანძრის გამომწვევი მიზეზი ჯერჯერობით ისევ უცნობია.
კომენტარები