საკრებულოს ყოფილი დეპუტატი, სოსო მანჯავიძე, სოციალურ ქსელში, წერს:
“ამასობაში ტეხასის სარჩელს, რომელიც მან პენსილვანიის, მიჩიგანის, ჯორჯიისა და ვისკონსინის წინააღმდეგ აშშ-ს უზენაეს სასამართლოში შეიტანა ამ შტატების მიერ აშშ-ს კონსტიტუციის დარღვევის ბრალდებით, კიდევ 17 შტატი შეუერთდა.
მოსალოდნელია, რომ სხვებიც შეუერთდებიან.
ჰანტერ ბაიდენის ყველა ანგარიშის შემოწმების ორდერი გაიცა.
მოკლე ხანში აშშ გენპროკურორის, უილიამ ბარის განცხადებას ელოდებიან.
აშშ უზენაესმა სასამართლომ ოთხ მოპასუხე შტატს 12 დეკემბრის 15 საათამდე მისცა პასუხისათვის.
სულ უფრო მწვავდება წინააღმდეგობები რუსეთსა და თურქეთს შორის.
ერდოგანი ” წითელ ხაზებს” გადავიდა და ყირიმის უკრაინისთვის ძალისმიერ გზებზე ალაპარაკდა. ყარაბაღში მიღწეული თანამშრომლობის ფორმატი მყიფეა, ლიბიაში რუსებმა თურქული ბაზა დაბომბეს, სირიაში ძალთა გადაჯგუფება მიმდინარეობს. რუსები ცდილობენ აღიდგინონ რენომე იმ შეურაცხყოფისთვის, რაც მათ სამხედრო პრესტიჟს ყარაბაღში მიადგა.
თურქეთს, უდიდესი პრობლემები აქვს არაბულ სამყაროსთან, რომლის ყველაზე ძლიერ წარმომადგენელს, ეგვიპტეს , უხვად უფინანსებენ არმიას არაბული მონარქიები.
დღეს ეგვიპტის არმია არათუ ჩამოუვარდება, არამედ ბევრი პარამეტრით აღემატება თურქულს, ხოლო ამ ქვეყნებს შორის დაძაბულობა პიკს აღწევს.
ასეთივე დაძაბულობაა დონბასში, სადაც სულ უფრო იზრდება კონფლიქტის ცხელ ფაზაში გადასვლის რისკი.
მოჰსენ შაჰრიზადეს მკვლელობის შემდეგ სულ უფრო მატულობს ისრაელ-აშშ-ს და ირანის სამხედრო დაპირისპირების ალბათობა.
ჩინეთმა, რომლის უარყოფით როლზე აშშ-ს არჩევნების საკითხში სულ უფრო ხშირად და აგრესიულად საუბრობენ შტატებში, ახალი, გაფართოებული ასეანი შექმნა და თავისუფალი ვაჭრობის ხელშეკრულებამ აზია-წყნარი ოკეანის რეგიონის 2, 5 მილიარდი ადამიანი მოიცვა.
მაგრამ მთავარი მოვლენები მაინც კვლავ საქართველოში ხდება.
სწორედ აქ მიმდინარე პროცესებზეა დამოკიდებული ნიუ-იორკის, ლონდონის , ჰონგ-კონგის ბირჟების ინდექსები.
მსოფლიო გაფაციცებით აკვირდება -შევა თუ არა პარლამენტში ელისაშვილი, კვლავ შეერთდება თუ არა “გირჩი” ინგა გრიგოლიას გულმდუღარე მოწოდების შემდეგ, ურქენს თუ არა ვაშაძე ბოკერიას და რა გზას დაადგება “ლელო”
გაურკვეველია რა შედეგით დამთავრდება შეჯახება შალვა ნათელაშვილსა და დონალდ ტრამპს შორის, რომელიც შალვას პოლიტიკურმა შვილმა, მაიკლ პომპეომაც კი ვერ მოაგვარა თბილისში სპეციალური ვიზიტისას.”ბანდიტი ტრამპი” და მისი სიძე,, “ბიძინა ივანიშვილის მაფიის მფარველი” ჯარედ კუშნერი შეიძლება კვლავ ხელისუფლებაში დარჩნენ და ბაზალეთის სასახლის შტურმისთვის საქართველოში სპეცრაზმი გამოგზავნონ.
თუმცა, ირაკლი კობახიძის გუშინდელმა გამოსვლამ მსოფლიოს იმედი გაუჩინა.
კრიზისის განმუხტვის მეთოდი ბულგაკოვის “ძაღლის გულიდან” იქნა გადმოღებული, სადაც თავგასულ შარიკოვს პროფესორი საკვების მიწოდების შეწყვეტით დაემუქრა.
“А где же я буду харчеватьса?”- ამ ტრაგიკულმა კითხვამ დროებით კი მოათვინიერა შარიკოვი, თუმცა შემდეგ, როგორც ცნობილია, კატების დაჭერაში და მოგუდვაში იღებდა ფულს.
როგორი საოცარი ანალოგიებია.”
კომენტარები