რუსულ კანონთან დაკავშირებით საქართველოს პარლამენტის VIII და IX მოწვევის დეპუტატები ერთობლივ განცხადებას ავრცელებენ და წერენ, რომ მისი მიზანი არა “გამჭვირვალობა,” არამედ სისტემისთვის მიუღებელი ადამიანების “მტრად” შერაცხვა, მათი დევნა და დაშინებაა, როგორც ეს ბოლო დღეების მოვლენებმაც გვაჩვენა.
განცხადებაში ასევე ნათქვამია, რომ მიმდინარე პროცესებზე პასუხისმგებლობა ეკისრება არა მხოლოდ მმართველ პოლიტიკურ პარტიას, არამედ თითოეულ პარლამენტის წევრს ინდივიდუალურად.
ყოფილი დეპუტატები “ოცნებასა” და უმრავლესობის წევრებს მოუწოდებენ, რომ დაუყოვნებლივ შეწყვიტონ საზოგადოებაში დაპირისპირების ხელოვნურად გამწვავება და შეწყვიტონ კანონის განხილვა.
“საპარლამენტო უმრავლესობის მიერ ინიცირებულმა “უცხოური გავლენის გამჭვირვალობის შესახებ” კანონპროექტმა უდიდესი საფრთხე შეუქმნა როგორც, საქართველოს კონსტიტუციით დეკლარირებულ საგარეო პოლიტიკურ კურსს, ასევე დემოკრატიას, მოსახლეობის კეთილდღეობასა და უსაფრთხოებას.
მიუხედავად იმისა, რომ, გასული წლის მოვლენებმა ცხადად დაგვანახა ქართული საზოგადოებისა და საქართველოს პარტნიორი ქვეყნების მკაფიო უარყოფითი დამოკიდებულება “რუსული კანონის” მიმართ, მმართველმა პარტიამ დაარღვია საჯარო პოლიტიკური დაპირება და ხელახლა განიზრახა მისი მიღება, რითაც ხელოვნურად შექმნა განხეთქილება, ერთის მხრივ, ქართულ საზოგადოებაში, მეორეს მხრივ კი, საქართველოს ხელისუფლებასა და ჩვენი ქვეყნის მეგობრებს შორის. ეს მხოლოდ საქართველოს მტრების ინტერესს წარმოადგენს.
ამ კანონპროექტის თვით განხილვაც კი, ემსახურება არა გამჭვირვალობის ინტერესს, არამედ იმ ქვეყნების მტრად წარმოჩენას, რომლებიც ათწლეულების განმავლობაში მხარს გვიჭერდნენ დემოკრატიულ და განვითარებულ სახელმწიფოდ ჩამოყალიბებაში, დღესაც ჩვენი ქვეყნის სუვერენიტეტისა და უსაფრთხოების გარანტორები არიან და რომელთა დახმარებით საქართველო უნდა გახდეს ევროკავშირის სრულფასოვანი წევრი. ამ ინიციატივის მიზანია არა გამჭვირვალობა, არამედ სისტემისთვის მიუღებელი ადამიანების “მტრად” შერაცხვა, მათი დევნა და დაშინება, როგორც ეს ბოლო დღეების მოვლენებმაც გვაჩვენა. საგანგაშოა ბოლო პერიოდში მომრავლებული ძალადობისა და მუქარის ფაქტები, რომლებსაც აშკარად ორგანიზებული სახე აქვს და რომლებმაც უკვე მიიღო ფიზიკური ანგარიშსწორების ფორმა. ვითარებას ამძიმებს ის ფაქტი, რომ შესაბამისი სახელმწიფო სტრუქტურები რეაგირების გარეშე ტოვებენ ასეთ ძალადობრივ შემთხვევებს.
დამოუკიდებლობის აღდგენიდან დღემდე, ჩვენი განვითარების ვექტორი არასდროს დამდგარა კითხვის ნიშნის ქვეშ მმართველი პოლიტიკური ძალების მხრიდან. ყოველთვის, ყველა ხელისუფლების პირობებში, საქართველო ისწრაფვოდა გამხდარიყო დასავლური ცივილიზაციის სრულყოფილი ნაწილი. მმართველი პარტიის ქმედებებს ჩიხში შეყავს ჩვენი ქვეყნის – საქართველოს შემდგარ, განვითარებულ, წელში გამართულ, ევროპულ სახელმწიფოდ ჩამოყალიბების შანსი, ვინაიდან, ამ კანონის მიღების შემთხვევაში, საქართველო არათუ ვერ წაიწევს წინ დასავლური ინტეგრაციის გზაზე, არამედ საფრთხეს შეუქმნის ყველა იმ ხელშესახებ შედეგს, რომელიც აქამდე მივიღეთ.
შარშანდელის მსგავსად, ამჯერადაც მივმართავთ “ქართულ ოცნებას” და საქართველოს პარლამენტის უმრავლესობის წევრებს: გაიაზრეთ საკუთარი პასუხისმგებლობა იმ უმძიმეს პროცესებზე, რომლის წინაშეც დგას ქვეყანა; დაუყოვნებლივ შეწყვიტეთ საზოგადოებაში დაპირისპირების ხელოვნურად გამწვავება; დაუყოვნებლივ შეწყვიტეთ “უცხოური გავლენის გამჭვირვალობის შესახებ” კანონპროექტის განხილვა.
პასუხისმგებლობა მიმდინარე პროცესებზე ეკისრება არა მხოლოდ მმართველ პოლიტიკურ პარტიას, არამედ თითოეულ პარლამენტის წევრს ინდივიდუალურად!
საქართველოს გზა არის ევროპისკენ და ამ გზას ალტერნატივა არ აქვს!,” – ნათქვამია განცხადებაში.
კომენტარები