მოსკოვის შერემეტიევოს საერთაშორისო აეროპორტში რუსული და ჩინური ავიაკომპანიების კუთვნილი თვითმფრინავები ერთმანეთს შეეჯახნენ. ინფორმაცია ინციდენტის შესახებ Reuters-მა რუსულ მედიასაშუალებებზე დაყრდნობით გაავრცელა.
გამოცემის ცნობით, შემთხვევა ოთხშაბათს, ღამით მოხდა, როდესაც თვითმფრინავები აეროპორტის ტერიტორიის ფარგლებში გადაადგილდებოდნენ. ავიაკომპანია „როსიის“ კუთვნილმა თვითმფრინავმა – Sukhoi Superjet-ი, სადესანტო ზოლზე მოძრაობისას მეორე თვითმფრინავს – Air Hainan-ის კუთვნილ Airbus A330-ს მიეჯახა, რის შედეგადაც რუსულ ავიალაინერს კუდის ნაწილი დაუზიანდა.
შემთხვევისას არავინ დაშავებულა, თუმცა ორივე თვითმფრინავი დაზიანდა. მგზავრები უსაფრთხოების ზომების გათვალისწინებით სხვა თვითმფრინავში გადაიყვანეს.
შემთხვევის გარემოებებს შესაბამისი სამსახურები იძიებენ. დამატებითი ინფორმაცია ჯერჯერობით არ გავრცელებულა.
კომენტარები