პოლიციამ კლდიაშვილის ქუჩაზე მომხდარი დაჭრის ფაქტი ცხელ კვალზე გახსნა. ინფორმაციას შსს ავრცელებს.
ჩატარებული საგამოძიებო მოქმედებების შედეგად სამართალდამცავებმა 1984 წელს დაბადებული, წარსულში მრავალჯერ ნასამართლევი და ამჟამად პირობითი მსჯავრის ქვეშ მყოფი პირი დააკავეს.
სანამ შსს-ს ოფიციალურ განმარტებას გაგაცნობთ, გეტყვით, თუ რას ყვებიან მეზობლები და თვითმხილველები.
მათი გადმოცემით, ახალგაზრდა მამაკაცს, იქვე მეზობლად შეყვარებული ჰყავდა, რომელსაც პერიოდულად აკითხავდა ხოლმე.
გუშინ, ერთ-ერთმა ასეთმა ვიზიტმა გოგონას დის გაღიზიანება გამოიწვია, მათ შორის სიტყვიერი შელაპარაკება კი იმდენად დაიძაბა, რომ ქალმა მამაკაცს თავში აგური ჩაარტყა, რა დროსაც თვალისა და წარბის არეშე დაზიანებები მიიღო.
ინციდნტის მონაწილეთა გაშველება ჯერ ქალის არასრულწლოვანმა, 16 წლის ბიჭმა სცადა, შემდეგ კი საქმეში ქალის მხარდასაჭერად იქვე უბანში მცხოვრები რამდენიმე მამაკაცი ჩაერთო, თუმცა ერთ-ერთმა მათგანმა შემთხვევით, თავად ამ ქალის არასრულწლოვანი შვილი დაჭრა.
„იარაღიდან გაისროლა და ფეხებში მოხვდა ტყვია ამ ბავშვს. შემთხვევით დაიჭრა, როგორც ჩანს, რადგან ეს ბიჭი, პირიქით, დედამისს და იმ შეყვარებულს აშველებდა. არ ვიცი, რად უნდოდათ საერთოდ იარაღი, იმ ბიჭისთვის (შეყვარებული) უნდა ესროლაო და შეეშალაო. კიდევ კარგი სერიოზული დაზიანება არ აქვს ბავშვს“, – ყვება ერთ-ერთი მეზობელი.
შსს მომხდარ ფაქტთან დაკავშირებით განცხადებას ავრცელებს, სადაც ვკითხულობთ:
„შინაგან საქმეთა სამინისტროს თბილისის პოლიციის დეპარტამენტის არასრულწლოვნების საქმეთა მთავარი სამმართველოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, 1984 წელს დაბადებული, წარსულში მრავალჯერ ნასამართლევი და ამჟამად პირობითი მსჯავრის ქვეშ მყოფი გ.ქ. ჯანმრთელობის განზრახ ნაკლებად მძიმე დაზიანებისა და ცეცხლსასროლი იარაღის უკანონო შეძენა-შენახვა-ტარების ბრალდებით, ცხელ კვალზე დააკავეს.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა თბილისში, კლდიაშვილის ქუჩაზე, სავარაუდოდ, ცეცხლსასროლი იარაღიდან გასროლით სხეულზე დაზიანებები მიაყენა 2004 წელს დაბადებულ კ.ჩ.-ს და შემთხვევის ადგილიდან მიიმალა.
არასრულწლოვანი სასწრაფო სამედიცინო დახმარების ჯგუფმა საავადმყოფოში გადაიყვანა, სადაც შესაბამისი დახმარება გაეწია. ამ დროისთვის, მის სიცოცხლეს და ჯანმრთელობას საფრთხე არ ემუქრება.
გრძელდება ოპერატიულ-საგამოძიებო მოქმედებები ამავე სისხლის სამართლის საქმესთან შესაძლო შემხებლობაში მყოფი სხვა პირების გამოკვეთისა და დაკავების მიზნით.
გამოძიება ჯანმრთელობის განზრახ ნაკლებად მძიმე დაზიანებისა და ცეცხლსასროლი იარაღის უკანონო შეძენა-შენახვა-ტარების ფაქტზე, საქართველოს სსკ-ის 118-ე მუხლის მე-3 ნაწილით, ასევე, 236-ე მუხლის მე-3 და მე-4 ნაწილებით მიმდინარეობს”, – ნათქვამია შსს-ს მიერ გავრცელებულ ინფორმაციაში.
კომენტარები