ჯანდაცვის მინისტრმა ეკატერინე ტიკარაძემ ჯანდაცვის სამინისტროში გამართულ ბრიფინგზე განაცხადა, უპასუხა კითხვას, ხომ არ იგეგმება 24 დეკემბრიდან კორონავირუსის პანდემიის გამო დაწესებული შეზღუდვების მოხსნის გადახედვა, ვინაიდან დაავადებათა კონტროლის ეროვნული ცენტრის ხელმძღვანელის ამირან გამყრელიძის თქმით, ამან შესაძლოა მობილობა გამოწვიოს და ე.წ. შავი პარასკევის შედეგები დადგეს:
„მნიშვნელოვანია აღინიშნოს, რომ ამ ეტაპისთვის გვაქვს სტაბილური მაჩვენებელი, ინფიცირებულთა რიცხვი 4500-ს არ აღემატება. ეს არის 1 კვირის მანძილზე რასაც ჩვენ ვაკვირდებით.
ჩვენ ჯერ არ გვაქვს მიღებული „შავი პარასკევის“ ეფექტი, რომელიც იცით თუ რეალურად რამდენად დრამატულად იყო ასახული, ამის შედეგებს ჩვენ ჯერ კიდევ მოვიმკით. აქედან გამომდინარე, ნაადრევია იმაზე საუბარი, თუ როგორი იქნება შეზღუდვების მოხსნა, ვინაიდან ჯერჯერობით ვსაჭიროებთ იმას, რომ ეპიდემიოლოგებმა გაანალიზონ ის მომდევნო ტალღა, რომელიც შესაძლოა მოსალოდნელი იყოს ჯერ კიდევ.
ჩვენ ვმსჯელობთ, ამას რიცხვები გვიჩვენებენ. ჩვენ გადაწყვეტილებებს სპონტანურად არ ვიღებთ, დინამიკას ვაკვირდებით, თუ როგორია ინფექციის მატება, ასევე ლეტალობის შემთხვევები, მნიშვნელოვანია გავითვალისწინოთ კლინიკების გადატვირთულობა, რომ მათაც მიეცეთ საშუალება ყველა პაციენტს შესაბამისად მისცენ ხარისხიანი მომსახურება, ამ ყველაფრის ჯამურად გაანალიზებისას მივიღებთ ერთობლივ გადაწვეტილებას“
შეგახსენებთ, ხელისუფლებამ, 28 ნოემბრიდან გამოაცხადა შეზღუდვები, 27 ნოემბერს კი მაღაზიებს ერთდღიანი “შავი პარასკევის” მოწყობის უფლება მისცა, პარალელურად კი, გამოაცხადა, რომ 28 ნოემბრიდან სურსათის და ქიმიის მაღაზიების გარდა, ყველა დაიკეტება. “ალია” აქვე იმასაც გეტყვით, რომ 28 ნოემბრიდან დღემდე, ამაოდ ვცდილობთ გავიგოთ, რამდენი მაღაზია დაჯარიმდა, ან გაფრთხილდა კონკრეტულად 27 ნოემბერს და სად იყო აღსრულების სამსახური, როცა მაღაზიებმა დაუშვეს უკონტროლო რიგები თავიანთ ტერიტორიაზე.
კომენტარები