შალვა ნათელაშვილის ღია წერილი დონალდ ტრამპს

ლეიბორისტული პარტიის ლიდერი, შალვა ნათელაშვილი აშშ-ს პრეზიდენტ დონალდ ტრამპს ღია წერილს უგზავნის:

საქართველოს ლეიბორისტული პარტიის მიმართვა

ამერიკის შეერთებული შტატების პრეზიდენტს, მის აღმატებულებას, დონალდ ტრამპს
ამერიკის შეერთებული შტატების სენატისა და წარმომადგენელთა პალატის ყველა წევრს
ამერიკის შეერთებული შტატების სახელმწიფო დეპარტამენტს
ამერიკის წამყვან მასმედიას და სტრატეგიული კვლევის ცენტრებს

ბატონო პრეზიდენტო, ძვირფასო ამერიკელო მეგობრებო,

მთელმა დემოკრატიულმა სამყარომ იცის, რომ პრორუსულმა, ტერორისტულმა დიქტატურამ რუსი ოლიგარქის, ივანიშვილის მეშვეობით, უკვე 14 წელია, მძევლად აიყვანა საქართველო, მოწყვიტა ქვეყანა ატლანტიკურ ცივილიზაციას და დააბრუნა მოსკოვის, თეირანისა და პეკინის პოლიტიკურ ორბიტაზე. რეჟიმმა თბილისი ანტიამერიკული პროპაგანდის მსოფლიო ცენტრადაც კი გადააქცია. შეჩერდა საქართველო-ამერიკის სტრატეგიული პარტნიორობის ქარტიის მოქმედებაც. ამ პერიოდში არ შეწყვეტილა ჩვენი ხალხის ბრძოლა რუსული ტირანიის წინააღმდეგ, რის გამოც ახლაც გრძელდება უსასტიკესი, მასობრივი პოლიტიკური რეპრესიები.

ქართველი ხალხი ელოდა, რომ თქვენი გაპრეზიდენტება, ბატონო ტრამპ, დააჩქარებდა ამ საშინელი ჯოჯოხეთის დასრულებას, მაგრამ ვხედავთ საპირისპირო, შოკისმომგვრელ შედეგებს. უკვე დაწყებულია თქვენი ადმინისტრაციის მეგობრული კონსულტაციები რუსი დიქტატორის რეჟიმთან; გაისმის პირდაპირი მოწოდებები ოპოზიციის მხრიდან რუსულ დიქტატურასთან კონსტრუქციულ თანამშრომლობაზე. პარალელურად, თქვენი ადმინისტრაციის პირობებში შეჩერდა 2024 წელს ვაშინგტონში დაწყებული ოლიგარქ ივანიშვილისა და მისი კლანის დასანქცირების პროცესი. უფრო მეტიც, სენატში გაიყინა „მეგობარი აქტის“ საბოლოოდ მიღების პროცედურები, არადა, სწორედ ეს დოკუმენტი წარმოადგენდა ჩვენი განთავისუფლების ქარტიას პუტინისტური რეჟიმისგან. აუხსნელია ისიც, რომ თქვენ საქართველოში მიმდინარე ტრაგედიაზე დღემდე ერთი განცხადებაც კი არ გაგიკეთებიათ.

ქართველი ხალხისთვის სრულ კატასტროფას წარმოადგენს სიახლე, რომ რუსმა დიქტატორმა ოლიგარქმა — ამერიკისგან ოფიციალურად დასანქცირებულმა ივანიშვილმა — თავისი ფონდების მეშვეობით ახლახან კონტრაქტი გააფორმა თქვენს საოჯახო კომპანია „TRUMP ORGANIZATION“-თან, მის მიერვე მიტაცებულ თბილისის იპოდრომზე „ტრამპ თაუერის“ მშენებლობის შესახებ. ყველაფერთან ერთად, ამან რეჟიმს მისცა იმის მტკიცების საშუალება, რომ ამერიკის პრეზიდენტის ოჯახზე პირდაპირი ფინანსური გზა გაჭრეს.

ბატონო პრეზიდენტო, აღსანიშნავია, რომ თქვენი პრეზიდენტობის პირველ ვადაშიც, თქვენი მაშინდელი ადმინისტრაციის სრული მხარდაჭერით, რუსი დიქტატორ-ოლიგარქის რეჟიმი გადაურჩა ჩამოშლას და დაიკანონა გაყალბებული არჩევნებიც კი. ჩვენ არც ის დაგვიწყებია, რომ 2012 წელს რუსი ოლიგარქი პროამერიკული ლოზუნგებით მოვიდა ხელისუფლებაში — ასევე პროამერიკული პოლიტიკური ძალების, არასამთავრობოებისა და მაშინდელი ვაშინგტონის ადმინისტრაციის ღია მხარდაჭერით. სასურველია, ვაშინგტონში მათ, ვისაც ეს ეხება, კარგად ახსოვდეთ, რომ საქართველო რუსეთის მხრიდან არაერთი აგრესიისა და ოკუპაციის მსხვერპლი სწორედ ამერიკასთან სტრატეგიული მოკავშირეობის გამო გახდა. იმედია, ამ პროპუტინისტური რეჟიმის თქვენგან მხარდაჭერით წყალში არ ჩაეყრება ჩვენი ხალხის მიერ გაღებული ეს უდიდესი მსხვერპლი.

ჩვენ არ ვითხოვთ თქვენგან მილიარდებს, იარაღს ან ომში მონაწილეობას. ქართველი ხალხი თქვენგან მოელის მხოლოდ პოლიტიკურ მხარდაჭერას, რუსი დიქტატორისა და მისი რეჟიმის ბოლომდე დასანქცირებას, მასზე სისხლის სამართლის წესით საერთაშორისო დევნის დაწყებას, რაც უნდა დაგვირგვინდეს ახალი, დემოკრატიული არჩევნებითა და საქართველოს დაბრუნებით ევროატლანტიკურ ცივილიზაციაში. იმედია, ჩვენს საერთო ღირებულებებს არავინ გაცვლის რამდენიმე კილომეტრიან ავტომაგისტრალში.

ყველა სხვა შემთხვევაში, არა მარტო თავისუფალი საქართველო გაქრება მსოფლიო რუკიდან, არამედ ამერიკაც სამუდამოდ დაკარგავს სტრატეგიულ მოკავშირეს ევრაზიის ცენტრში და კავკასიაში გეოპოლიტიკური კონტროლის ფუნქციას დაუთმობს მოსკოვს, პეკინს, თეირანსა და მსგავსი ტოტალიტარული სისტემის სხვა ბოროტებებს.

გვინდა გისურვოთ უდიდესი წარმატებები დიდი ამერიკის მშენებლობაში.

პატივისცემით,
პარტიის ლიდერი შალვა ნათელაშვილი