სექსუალური ექსპლუატაციის მსხვერპლი შშმ ქალის უმძიმესი ჩვენება- ადამიანით ვაჭრობის ბრალდებით ცოლ-ქმარი დააკავეს

სექსუალური ექსპლუატაციის მსხვერპლი ქალის უმძიმესი ჩვენება – “კურიერმა” ექსკლუზიურად მოიპოვა შეზღუდული შესაძლებლობის მქონე პირის დაკითხვის ოქმი, სადაც ის ჰყვება, რომ ტრეფიკიორი ცოლ ქმარი დღეში, დაახლოებით, 8 მამაკაცთან სქესობრივი კავშირის დამყარებას აიძულებდა.

კლიენტებისგან გამომუშავებული თანხის გარდა, ცოლ-ქმარმა მსხვერპლის საპენსიო ბარათი და შემწეობის თანხაც მიითვისა. დანაშაულის ადგილი მტკვრის მარცხენა სანაპიროა, სადაც ქალი იძულებით პროსტიტუციაში ოთხი წლის განმავლობაში იყო ჩართული. ადამიანით ვაჭრობის ბრალდებით სამართალდამცველებმა ცოლ-ქმარს ხელბორკილები დაადეს. 8 ტომიან საქმის მასალებში ფარული აუდიო-ვიდეო მასალებიც დევს.

ახალგაზრდა ქალის მცირეწლოვანი შვილი, ახლა მინდობით აღზრდაშია. თავად დედა ტრეფიკინგის მსხვერპლთა თავშესაფარში გადაიყვანეს. მან ოთხწლიანი სექსუალური ექსპლუატაციის შემდეგ დუმილი დაარღვია და დანაშაულში ამხილა მისივე ნაცნობი ცოლ ქმარი – ხათუნა და ლევან აბულაძეები.

დაზარალებული ქალის მონათხრობს ამყარებს გამოძიების მიერ მოპოვებული ფარული სატელეფონო საუბრებიც. საქმის მასალებში დევს ჩანაწერები, სადაც ლევან აბულაძე სასაფლაოს ტერიტორიაზე მომხდარი ძალადობის შესახებ საუბრობს. ის ცოლს უყვება, თუ როგორ სცემა შეზღუდული შესაძლებლობის მქონე ქალს მხოლოდ იმიტომ, რომ მან ქუჩაში საკმარისი თანხა ვერ გამოიმუშავა.

შეზღუდული შესაძლებლობის მქონე პირი, აბულაძეებისთვის არარსებული ვალის გასასტუმრებლად, იძულებული იყო საღამოს შვიდი საათიდან დილის 12 საათამდე გზის პირას მდგარიყო და კლიენტებისთვის სქესობრივი ურთიერთობა შეეთავაზებინა. ჩვენებების გარდა, ფაქტს ფარული ჩანაწერიც ადასტურებს.

სექსუალური ექსპლუატაციის მსხვერპლს ცოლ-ქმარმა საპენსიო ბარათი ჩამოართვა და რამდენიმე თვის შემწეობა წაართვეს. მას არ აძლევდნენ არც კვების, არც გათბობის და არც შესვენების უფლებას.

“რუსთავი 2” თბილისში, ადამიანით ვაჭრობაში მხილებული ცოლ-ქმრის საცხოვრებელ მისამართზე იმყოფებოდა. მეზობლებისთვის ცნობილია, რომ აბულაძეები ტრეფიკინგისთვის დააკავეს. წყვილის საეჭვო საქმიანობის გამო კორპუსში ადგილობრივებმა ვიდეო კამერებიც კი დაამონტაჟეს.

ბრალდებულები მოსამართლის გადაწყვეტილებით უკვე წინასწარ პატიმრობაში არიან. ადვოკატი კომენტარს არ აკეთებს, თუმცა საქმეში არსებულ მტკიცებულებებზე “კურიერს” პროკურორი ესაუბრა. ბრალდების მხარე დარწმუნებულია, რომ ტრეფიკინგში მხილებული ცოლ-ქმარი უმკაცრესად დაისჯება.

პროკურორი ჰყვება, რომ ხათუნა და ლევან აბულაძეები მსხვერპლის უმწეო მდგომარეობას პირადი სარგებლისთვის იყენებდნენ. მათ შეზღუდული შესაძლებლობების მქონე ახალგაზრდა ქალი ფინანსური შემოსავლის წყაროდ აქციეს. პროკურორის თქმით, დაზარალებულს მთელი ოთხი წლის განმავლობაში აიძულებდნენ პროსტიტუციას და ტრეფიკიორები სრულად განკარგავდნენ ქალის მიერ გამომუშავებულ თანხას. ბრალმდებელი ადასტურებს იმასაც, რომ დაზარალებული არაერთხელ გახდა ფიზიკური ანგარიშსწორების სამიზნეც.

ხათუნა და ლევან აბულაძეები ახლა პენიტენციურ დაწესებულებაში, წინასწარ პატიმრობაში იმყოფებიან. დანაშაულის დამტკიცების შემთხვევაში, ცოლ-ქმარს 15 წლით თავისუფლების აღკვეთა ემუქრება.