სენაკის საკრებულოს შუალედურ არჩევნებში ცესკოს წინასწარი მონაცემების თანახმად, „ქართული ოცნების“ კანდიდატმა ზაზა ყურაშვილმა გაიმარჯვა. მან ხმების 96,68% ანუ 962 ხმა მოიპოვა.
როგორც ცენტრალური საარჩევნო კომისიის პრეს-სპიკერმა ნათია იოსელიანმა განაცხადა, ცნობილია, რომ წინასწარი შედეგებით, ყურაშვილის ერთადერთმა კონკურენტმა „სოციალური სამართლიანობისთვის“ კანდიდატმა მამუკა ტუსკაძემ, არჩევნებში ხმათა მხოლოდ 3,32% ანუ 33 ხმა მიიღო.
მისივე თქმით, არჩევნებში მონაწილეობდა ამომრჩეველთა 44,26% – 1021 ადამიანი.
“მას შემდეგ, რაც შედგება საუბნო შემაჯამებელი ოქმები, ისინი გადაეცემა სენაკის საოლქო საარჩევნო კომისიას, დასკანერდება და უმოკლეს ვადაში მიეწოდება ცესკოს, რის შემდეგაც აიტვირთება სპეციალურ ვებ-გვრდზე. ხმის დათვლის პროცესის ამსახველი ვიდეომასალა კი აიტვირთება „გუგლ დრაივის“ პლატფორმაზე.
კენჭისყრის დღე წარმატებით, კანონმდებლობის შესაბამისად დასრულდა. ამომრჩევლებს შესაძლებლობა ჰქონდათ საკუთარი არჩევანი გაეკეთებინათ ჯანმრთელობისთვის უსაფრთხო და მშვიდ გარემოში. საარჩევნო მოხელეები უბნებზე მაღალპროფესიულ დონეზე ემსახურებოდნენ ამომრჩევლებს. გვინდა, მადლობა გადავუხადოთ ამომრჩევლებს აქტიურობისთვის, ასევე, მადლობას ვუხდით ყველა დონის საარჩევნო კომისიების წევრებსა და თანამშრომლებს კენჭისყრის დღის მაღალ დონეზე ორგანიზებისთვის”, – განაცხადა ნათია იოსელიანმა.
კომენტარები