ლევან ჯავახიშვილი
„ალიას“ ესაუბრება პოლიტიკოსი, კახა მიქაია.
– ბატონო კახა, ოფიცერ მიხეილ ქამხაძის პირადი საქმე რუსულმა მედიამ ააფრიალა, უკრაინაში აღმოჩნდა რუსების ხელში. ეს პირველი შემთხვევა არ არის, როდესაც 2008 წლის რუსეთ-საქართველოს და რუსეთ-უკრაინის ომის მონაწილეთა პირადი საქმები რუსეთის დაინტერესებულ წრეებს და სპეცსამსახურებს უვარდებათ ხელში. არადა, ნებისმიერი სამხედრო მოსამსახურის საქმეს, მოქმედისა და თადარიგში გასულისას, თავდაცვის სამინისტროში გრიფი „საიდუმლო“ ადევს. სახელწიფო აღარ გვაქვს, ეს ყველაფერი კეთდება შეგნებულად და რუსეთის გულის მოსაგებად? როგორ შეაფასებთ ამ ფაქტებს, რომლებიც უკვე წლებია გრძელდება?
– აქ აშკარად ჩანს ყველაფერი, ხელის გულზე დევს. საქართველოში სუს-ი მუშაობს რუსეთზე, ეს დარწმუნებით შემიძლია გითხრათ. ასეთი მონაცემები როდესაც რუსულ პრესაში ჩნდება, ეს არის აქედან წასული მასალები. საქართველოს უსაფრთხოების სამსახური მუშაობს რუსეთზე და მისი მესვეურნი მზად არიან, რუსული სპეცსამსახურების ყველა დავალება შეასრულონ.
– არა მხოლოდ სუს-ი, სავარაუდოდ, თავდაცვის სამინისტროც თავისი სპეცსამსახურებით, არა?
– რა თქმა უნდა, თავდაცვის სამინისტროც, მისი სპეცსამსახურებიც რუსეთზე მუშაობენ, მაგრამ მთავარი მაინც სუს-ია. თუ გაჟონა ამ ინფორმაციებმა და ეს არ იცოდნენ სუს-მა და თავდაცვის სამინისტრომ, ეს კიდევ უარესი. თუმცა, მე ვფიქრობ, აქ ჩანს პირდაპირი თანამშრომლობა ქართული ძალოვანი სტრუქტურებისა რუსეთის უშიშროების სამსახურებთან.
– სახელმწიფოს, რომელსაც, ფაქტიურად, ისეთი უსაფრთხოების სამსახურები არ გააჩნია, რომლებიც ამ სახელმწიფოს ინტერესებს დაიცავენ, ის სახელმწიფო აღარ არის. შეიძლება ვთქვათ, რომ აღარ გვაქვს ჩვენ სახელმწიფო?!
– რა თქმა უნდა, ასეა. ჩვენ მართლა აღარ გვაქვს სახელმწიფო. ეს ახლა არ ხდება, ახალი ამბავი არ არის და კარგა ხანია, ასე ხდება. დამისახელეთ ერთი ფაქტი, როდესაც საქართველოს ხელისუფლებამ მწვავედ გააკრიტიკა რუსეთის აგრესია უკრაინაში!
– ცხადია, ვერ დაგისახელებთ.
– ჰოდა, ეს ნიშნავს იმას, რომ ჩვენ, ფაქტობრივად, სახელმწიფოებრიობა არ გაგვაჩნია.
კომენტარები