საქართველოში „ომიკრონით“ ინფიცირების ლაბორატორიულად დადასტურებული შემთხვევების რაოდენობამ 1000-ს გადააჭარბა, თუმცა დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, „ომიკრონის“ 1009 შემთხვევიდან ჰოსპიტალიზაცია მხოლოდ 14 -ს დასჭირდა.
„ლაბორატორიები გავაფრთხილეთ, რომ „ომიკრონის“ საეჭვო შემთხვევები შერჩევითად გამოგვიგზავნონ შესამოწმებლად. ამ ტიპის შემთხვევების რაოდენობა საერთო დიაგნოსტირებულებში 60%-ია. ცირკულაციაში „ომიკრონის“ რაოდენობა 45-პროცენტიდან ზემოდ მიდის.
1009 შემთხვევიდან მხოლოდ 14-ის ჰოსპიტალიზაცია მოხდა, 12-მა უკვე კლინიკა დატოვა. აქედან არცერთს არ დასჭირვებია ინტენსიური და რეანიმაციული დახმარება. ერთი იყო 37 კვირის ორსული, რომელიც ასევე გაიწერა ნორმალურ მდგომარეობაში“, – განაცხადა ამირან გამყრელიძემ.
მისი თქმით, 1009 შემთხვევიდან 92 18-წლამდე ბავშვი და მოზარდია, აქედან 16 5-წლამდე ბავშვი.
„საერთაშორისო მონაცემით, „დელტასთან“ შედარებით შემცირებულია ინკუბაციის პერიოდი, შემცირებულია ჰოსპიტალიზაცია. აცრილებში „ომიკრონი“ ბევრად იოლად მიმდინარეობს, „ბუსტერი“ ნამდვილად მუშაობს და ამიტომ „ბუსტერიზაცია“ ერთ-ერთი მთავარი დამცველი საშუალებაა“, – განაცხადა ამირან გამყრელიძემ.
კომენტარები