საქართველოს ბიზნესასოციაცია ასეულობით ბიზნესკომპანიის ინტერესებისა და თხოვნის გათვალისწინებით, მიიჩნევს, რომ ბიზნესის მხარდასაჭერად განხორციელებული ის საგადასახადო შეღავათები, რომლებიც საქართველოს მთავრობამ მიმდინარე წლის გაზაფხულზე პანდემიის შედეგების შესამსუბუქებლად შემოიღო, გარკვეული პერიოდით დამატებით უნდა გაგრძელდეს.
ინფორმაციას საქართველოს ბიზნესასოციაცია ავრცელებს.
„უპირველეს ყოვლისა, უნდა ითქვას, რომ პანდემიის დაწყებიდანვე ასოციაცია ჩართული იყო და მიესალმა ბიზნესისთვის საგადასახადო შეღავათების დაწესებას. ამასთან, საგადასახადო შეღავათები დროში გაიწერა და გათვლილი იყო პანდემიის პირველი ტალღის ნეგატიური შედეგების შემსუბუქებაზე.
იმ პერიოდში შემუშავებული ღონისძიებათა პაკეტი, ბუნებრივია, ვერ გაითვალისწინებდა ბიზნესოპერატორების წინაშე შემოდგომაზე, ანუ პანდემიის მე-2 ტალღის დროს წამოჭრილ ახალ სირთულეებს.
უფრო მეტიც, დღეს ბიზნეს ოპერატორები კიდევ უფრო მეტი სიმწვავით განიცდიან იმ პრობლემებს, რასაც ისინი პანდემიის პირველ თვეებში აწყდებოდნენ. საგადასახადო შეღავათები კი, რომლებიც სხვა ღონისძიებებთან ერთად, საქართველოს მთავრობის მიერ შემუშავებული ბიზნესის მხარდაჭერის პაკეტში შედიოდა, მოიცავდა შემდეგ ღონისძიებებს:
1. 2020 წლის 1-ლი მაისიდან 6 კალენდარული თვის განმავლობაში დამქირავებელი უფლებამოსილი გახდა შეემცირებინა (ბიუჯეტში არ შეეტანა) დაქირავებულისთვის გაცემული 750 ლარამდე ხელფასიდან დასაკავებელი და გადასახდელი საშემოსავლო გადასახადი, თუ ამ დაქირავებულის მიერ ამავე დამქირავებლისგან 1 კალენდარული თვის განმავლობაში მიღებული ხელფასი 1500 ლარს არ აღემატებოდა. საგადასახადო კოდექსში შეტანილი ეს ცვლილება მოქმედებდა 2020 წლის ოქტომბრის ბოლომდე და შესაბამისად დღეს უკვე ეს შეღავათი ბიზნესს აღარ აქვს.
2. ტურიზმისა და სტუმარ-მასპინძლობის ინდუსტრიას (სასტუმროები, განთავსების მსგავსი საშუალებები; რესტორნები და საკვებით მომსახურების საქმიანობები; ტურისტული სააგენტოები, ტურ-ოპერატორები და სხვა) საქართველოს საგადასახადო კოდექსში განხორციელებული ცვლილებით 2020 წლის თებერვალში, მარტში, აპრილსა და მაისში გადასახდელი საშემოსავლო გადასახადის გადახდა 2021 წლის 1-ელ დეკემბრამდე გადაუვადდა და გადასახადის გადამხდელებს საგადასახადო კოდექსით გათვალისწინებული საურავი არ ერიცხებოდათ. ზემოაღნიშნული საგადასახადო შეღავათების გაჩენამ საგადასახადო კანონმდებლობაში ძალიან პოზიტიური გავლენა იქონია ეკონომიკის მთელ რიგ სექტორებზე, რადგანაც მან საშუალება მისცა ბიზნესს ძალიან რთულ და არაპროგნოზირებად გარემოში, როდესაც მასიურად ხდება შემოსავლების კლება, სახელმწიფოს მიერ დატოვებული რესურსების ხარჯზე შეენარჩუნებინათ სამუშაო ადგილები. როგორც უკვე აღინიშნა, დღეისათვის საშეღავათო პერიოდი ამოიწურა, და ეს ხდება მაშინ, როდესაც, პანდემიასთან დაკავშირებული პრობლემები გრძელდება და, უფრო მეტიც, ამ კუთხით სახეზეა სიტუაციის შემდგომი დამძიმება.
ძალიან დიდი ალბათობით, მომდევნო თვეების განმავლობაში ბიზნესს გაუჭირდება სამუშაო ადგილების შენარჩუნება, ხოლო სამუშაოს გარეშე დარჩენილი ადამიანები დამატებით ტვირთად დააწვება როგორც სახელმწიფოს ასევე ზოგადად საზოგადოებას. რაც შეეხება ტურიზმისა და სტუმარ-მასპინძლობის ინდუსტრიას, ყველას კარგად ესმის, რომ ეს სექტორი პანდემიის გამო ერთ-ერთი ყველაზე მეტად დაზარალებული სექტორია და იგი პრაქტიკულად გაჩერებულია.
ადვილად წარმოსადგენია, რომ ამ სექტორში მოღვაწე კომპანიათა უმრავლესობას (მიუხედავად იმისა მსხვილი, საშუალო თუ მცირე ზომის არის კომპანია) საკმაოდ მწვავე ხასიათის პრობლემები შეექმნებათ, თუ ისინი ამა წლის 1-ელ დეკემბერს დაგროვილი საშემოსავლო გადასახადის გადახდის აუცილებლობის წინაშე დადგებიან. შესაბამისად, ვითვალისწინებთ რა სრულიად ქართული ბიზნესის წინაშე მდგომ გამოწვევებს, ვთხოვთ საქართველოს მთავრობას და საქართველოს ახლად არჩეულ პარლამენტს, რომ უმოკლეს ვადებში მოხდეს ცვლილებების შეტანა საგადასახადო კოდექსში.
1. კერძოდ საშემოსავლო გადასახადთან დაკავშირებული ის შეღავათი, რომელიც 1500 ლარამდე ხელფასებს შეეხებოდა, დამატებით გაგრძელდეს კიდევ 6 (ექვსი) თვით და, შესაბამისად, სრულად მოიცვას ერთწლიანი პერიოდი 2020 წლის 1-ლი მაისიდან 2021 წლის 1-ელ მაისამდე;
2. ტურიზმისა და სტუმარ-მასპინძლობის ინდუსტრიას ჩამოეწეროს საქართველოს საგადასახადო კოდექსში ამა წლის 22 მაისს განხორციელებული ცვლილების საფუძველზე გადავადებული და დაგროვებული საშემოსავლო გადასახადი.
გვინდა ხაზგასმით აღვნიშნოთ, რომ ორივე თხოვნა პირდაპირ კავშირშია და ემსახურება ჩვენს ქვეყანაში სამუშაო ადგილების შენარჩუნებას, რაც ვფიქრობთ, უნდა იყოს ნებისმიერი ჩვენგანის ერთ-ერთი მთავარი საზრუნავი. ვინაიდან, საქართველოს საგადასახადო კოდექსში ცვლილების შეტანა არის საქართველოს პარლამენტის უფლებამოსილება, საქართველოს ბიზნესასოციაცია გამოთქვამს სრულ მზადყოფნას პროფესიულ დისკუსიებში ჩაერთოს ყველა მხარესთან, რათა ძალიან სწრაფად, საქართველოს ახალი პარლამენტის პირველივე სხდომებზე მოხდეს ამ ცვლილებების განხილვა და შესაბამისი გადაწყვეტილების მიღება“,- ნათქვამია ბიზნესასოციაციის განცხადებაში.
კომენტარები