„საქართველომ კანდიდატის სტატუსი რაც შეიძლება სწრაფად უნდა მიიღოს, რადგან ეს მნიშვნელოვანი სტრატეგიული გზავნილი იქნება რუსეთისთვის“, – ამის შესახებ საქართველოს პრეზიდენტმა სალომე ზურაბიშვილმა ოქსფორდის უნივერსიტეტში სიტყვით გამოსვლისას განაცხადა.
„ევროპული პერსპექტივის მიღება დიდი ნაბიჯია, ამავდროულად ჩვენ არ მიგვიღია კანდიდატის სტატუსი, რომელიც ჩვენი ასოცირებული ტრიოს დანარჩენმა ორმა მეგობარმა და პარტნიორმა მიიღო. ამან, რა თქმა უნდა, საქართველოს მოსახლეობაში გარკვეული იმედგაცრუება გამოიწვია, რადგან მათთვის ნათელი იყო ის ფაქტი, რომ ტექნიკური თვალსაზრისით ჩვენ, შესაძლოა, უფრო შორს წავედით ევროინტეგრაციის გზაზე, მაგრამ ამავდროულად გვესმის, რომ ჩვენი ევროპული პერსპექტივა და ორი დანარჩენი ქვეყნის კანდიდატის სტატუსის მინიჭება იმ ბრძოლის შედეგად მოხდა, რომელსაც უკრაინელი მოსახლეობა აწარმოებს.
მე ერთ-ერთი ვარ ვინც აკრიტიკებს ქვეყნის შიგნით რეფორმების ნაკლებობას, ასევე, კრიტიკული ვარ, როდესაც ქვეყანა არ მიდის იმ მიმართულებით საითაც უნდა მიდიოდეს. აშკარაა, რომ ჩვენ არ ვართ იდეალურები, თუმცა ვფიქრობ, საქართველოს არ აქვს იმის ფუფუნება მეორედ მიიღოს უარი კანდიდატის სტატუსზე. საქართველომ კანდიდატის სტატუსი რაც შეიძლება სწრაფად უნდა მიიღოს, რადგან ეს მნიშვნელოვანი სტრატეგიული გზავნილი იქნება რუსეთისთვის“, – აცხადებს სალომე ზურაბიშვილი.
კომენტარები