„საქართველო გახდა ერთ-ერთი პირველი ქვეყანა მსოფლიოში, რომელმაც კორონავირუსი გადააქცია შიშისზარის დამცემი ვირუსისგან რიგით რესპირაციულ ვირუსად“ – თენგიზ ცერცვაძე

საქართველო გახდა ერთ-ერთი პირველი ან შეიძლება საერთოდ პირველი ქვეყანა მსოფლიოში, რომელმაც კორონავირუსი გადააქცია პანდემიური და შიშისზარის დამცემი ვირუსისგან რიგით რესპირაციულ ვირუსად, – ამის შესახებ ინფექციური საავადმყოფოს დირექტორმა, თენგიზ ცერცვაძემ „პალიტრანიუსის“ გადაცემა „დღის ნიუსრუმში“ განაცხადა.

„ბევრი სვამს კითხვას, ჰონკონგის ვირუსი ან რინოვირუსი ან რესპირაციული ვირუსი უფრო საშიშია, ვიდრე კორონავირუსი. ეს ნიშნავს ერთს, რომ კორონავირუსი იმართება ძალიან კარგად და ჩვენ მას მოვერიეთ. მაინც კორონავირუსი რჩება პოტენციურად უფრო საშიშად, მაგრამ პრაქტიკულად მათ შორის სიმძიმეში განსხვავება წაიშალა. ეს რომ მესმის მიხარია, არა იმიტომ, რომ ისინი საშიშია, ისინი ჩვეულებრივად საშიშია, როგორც იყო, კორონავირუსი აღარაა საშიში, ჩვენ მოვერიეთ კორონავირუსს და ეს არის ძალიან კარგი დამადასტურებელი არგუმენტი იმისთვის, რომ საქართველო გახდა ერთ-ერთი პირველი ან შეიძლება საერთოდ პირველი ქვეყანა მსოფლიოში, რომელმაც კორონავირუსი გადააქცია პანდემიური და შიშისზარის დამცემი ვირუსისგან რიგით რესპირაციულ ვირუსად“, – განაცხადა თენგიზ ცერცვაძემ.

მისივე განცხადებით, კოვიდპანდემიის მართვის მხრივ საქართველოში არსებულმა კარგმა სიტუაციამ მოსახლეობაში მისი დასრულების შესახებ აზრი გააჩინა, თუმცა პანდემია ჯერ არ დამთავრებულა და ჯერ არც მთავრდება.

„კოვიდპანდემიის მიმართ საქართველოში ძალიან კარგმა სიტუაციამ გააჩინა ერთგვარი არასწორი შეხედულება მოსახლეობაში, რომ კოვიდპანდემია დამთავრდა ან მთავრდება, არა! ჯერ საქართველოშიც არ დამთავრებულა მთლიანად, მაინც არის ყოველდღიურად 100-დან 500-მდე შემთხვევა და ძალიან მცირე, მაგრამ გარდაცვალების შემთხვევებიც. მაგრამ მსოფლიოში ასე არაა, ყოველდღიურად ფიქსირდება 300-400 ათასი შემთხვევა და 1000-1500 გარდაცვალება. მკვეთრად მოიკლო ინტენსივობამ, პიკიდან გამოსული ვართ, ბოლო პერიოდში სტაბილურია, მაგრამ ჯერ დამთავრების პირი არ უჩანს, პირიქით, ბოლო პერიოდში, საერთო კლების ფონზე შეინიშნა რიგ ქვეყნებში, ევროკავშირში, ამერიკაში და განსაკუთრებით იაპონიაში მატება. გუშინ იაპონიაში იყო 60 ათასი ახალი შემთხვევა. როგორ შეიძლება დამთავრებაზე ლაპარაკი, როდესაც ყველაზე წარმატებულ ქვეყანაში კოვიდის მართვაში, იყო 60 ათასი შემთხვევა“, – განაცხადა თენგიზ ცერცვაძემ.

როგორც თენგიზ ცერცვაძემ გადაცემაში განაცხადა, მსოფლიოში კორონავირუსის ორი ახალი შტამი ცირკულირებს, რომლებიც მომავალში დომინანტი გახდებიან, თუმცა ჯერ საქართველოში ისინი არ დაფიქსირებულა.

„ორი ახალი ქვევარიანტი ფიგურირებს ამჟამად მსოფლიოში და მალე გახდებიან ისინი დომინანტები, ამერიკაში უკვე აგხდნენ, ხოლო საქართველოში ჯერ ეს შტამები არ დაფიქსირებულა. საქართველოში იმდენად შემცირდა შემთხვევების რაოდენობა და ასევე ერთ მილიონ მოსახლეზე ჩვენთან არის 2-5-10-20-ჯერ ნაკლები სიკვდილიანობა, ვიდრე მსოფლიოს წამყვან ქვენებში, რომ ჩვენ არ ველოდებით, რომ მასშტაბურ ხასიათს მიიღებს ვირუსის ახალი შტამები. ჩვენ გვაქვს იმედი, რომ საქართველო შეინარჩუნებს ძალიან დაბალ დონეს, როგორც კორონავირუსის შემთხვევების, ასევე კორონავირუსით გარდაცვალების. თუმცა ეს მხოლოდ ვარაუდია.“