„სამწუხაროდ, თქვენც კრემლის საქმე გააკეთეთ, როცა…“ – ჩერგოლეიშვილი კელი დეგნანს

„ტაბულას“ რედაქტორი თამარ ჩერგოლეიშვილი კელი დეგნანის განცხადებას პასუხობს.

შეგახსენებთ, რომ აშშ-ს ელჩმა ლევან ვასაძესა და რუსეთთან აფილირებული ჯგუფების შესახებ „რუსთავი 2“-ის ჟურნალისტის შეკითხვას ასე უპასუხა:

„ვფიქრობ, ყველამ იცის, ვინ აფინანსებს კრემლის ამ ტიპის დეზინფორმაციებს. ის ხალხი, ვისაც სურს, დანერგოს ძალადობა, შექმნას არასტაბილურობა დაკავებული არიან კრემლის საქმის კეთებით, რათა გამოიწვიონ უთანხმოება და არასტაბილურობა საქართველოში. ვფიქრობ, ქართველები საკმარისად გონიერები არიან, რომ მიხვდნენ, თუ კონკრეტულად ვინ დგას ამ ყველაფრის უკან, ვინ იხდის ამაში ფულს.“

თამარ ჩერგოლეიშვილი კელი დეგნანს:

„სამწუხაროდ, თქვენც კრემლის საქმე გააკეთეთ, როცა:

– ქართველებზე პომპეოს თანხმლებ პრესას უთხარით, რომ ჩვენ არჩევნებს სულ ვაყალბებთ და განსაკუთრებული არაფერი მომხდარა.

– როცა ივანიშვილის რეჟიმის ნაცვლად, დემოკრატიული ოპოზიცია გატეხეთ და შინაარსისგან სრულიად დაცლილ, სამარცხვინო დოკუმენტზე ხელი მოაწერინეთ.

– როცა 700 ათას ამომრჩეველს გამოუცხადეთ, რომ შარლ მიშელის დოკუმენტით ისტორიული ეროვნული თანხმობა გაფორმდა და ამით ისინი გამაშგარე დატოვეთ – და ამით დემოკრატიული პროცესისადმი პროდასავლური ამომრჩევლის ნდობას საფუძველი შეურყიეთ.

– როცა ჭეშმარიტად პროდასავლური ძალების ოსტრაკიზება დაიწყეთ იმიტომ რომ ისინი თქვენს დღის წესრიგს ლეგიტიმურად არ ეთანხმებიან.

– როცა იმ მიზეზით, რომ ქართულ პოლტიკაში “კარგი ბიჭები” არ არსებობენ (და ამაში მეც გეთანხმებით – ვინცაა, ჯერ სუსტია), პრინციპების დაცვაზე თქვით უარო და მოძალადე იაკობთან პიიტეტით თავი დახარეთ.

მე ეს არ მიხარია, მაგრამ ეს ფაქტია და თუ თავისუფლება რამეს ნიშნავს, პირველ რიგში იმის მოსმენას, რისი მოსმენაც არ გსურთ.

ამ ქვეყანაში რაც მოხდება, ამაზე პასუხისმგებლები ჩვენ ვართ! მაგრამ რეალობა ისაა, რომ თქვენც კრემლის საქმის გაკეთება გამოგივიდათ და რამდენად შეესაბამება ეს იმ ქვეყნის ინტერესებს, რომელსაც წარმოადგენთ და რაზეც თქვენ ხართ პასუსისმგებელი – არ ვიცი.“