„სად არის ვაქცინა“ – აქცია მთავრობის ადმინისტრაციასთან

„სად არის ვაქცინა“ – ამ ლოზუნგით მიმდინარეობს საპროტესტო აქცია საქართველოს მთავრობის ადმინისტრაციის წინ. 

როგორც „ნაციონალური მოძრაობის“ წევრი გიორგი ჩალაძე აცხადებს, დღევანდელი აქცია-პერფორმანსი არის მდუმარე.

მისივე თქმით, ის, რომ ქვეყანაში ამ დრომდე არ არის შემოტანილი ვაქცინის ერთი დოზაც კი, სურვილის არ ქონას ნიშნავს.

პარტია „სტრატეგია აღმაშენებელის“ წევრი, ჯანდაცვის ექსპერტი სერგო ჩიხლაძე აცხადებს, რომ ვაქცინასთან დაკავშირებით გამოსავლის გზა არის ერთადერთი, რომ ერთობლივად უახლოეს დღეებში მოხდეს პასუხისმგებლობის გადანაწილება.

„ახალი გრაფიკი შევადგინოთ ვაქცინების შემოტანის, მოლაპარაკების, ადმინისტრირების და ერთობლივად გამოვიდეთ ამ სიტუაციიდან“, – განაცხადა ჩიხლაძემ „რუსთავი 2“-ის ეთერში.

ინფორმაციისთვის, ჯანდაცვის სამინისტროს განცხადებით, საქართველოში კორონავირუსის ვაქცინის შემოსვლა მარტის მეორე ნახევრისთვის გადაიდო.

როგორც ჯანდაცვის მინისტრის მოადგილემ თამარ გაბუნიამ განმარტა, გაირკვა, რომ საქართველო პირველად Astrazeneca-ს წარმოების ვაქცინას მიიღებს.