დაავადებათა კონტროლის ცენტის ხელმძღვანელმა კორონავირუსის 26 ახალი შემთხვევის წყაროზე ისაუბრა. ამირან გამყრელიძის თქმით,18 უკავშირდება ყველაზე ცხელ წერტილს – ბოლნისის მუნიციპალიტეტს.
„იანვრიდან დღემდე 57 000 შესაძლო შემთხვევა გვაქვს გამოკვლეული, აქედან გვაქვს 783 არის დადასტურებული, 24 საათის განმავლობაში გვყავს 26 ახალი ინფიცირებული, მათგან 18 უკავშირდება ყველაზე ცხელ წერტილს – ბოლნისის მუნიციპალიტეტს, 17 არის სოფელი მუშევანიდან, სადაც თითქმის მთელი სოფელი, 574 ადამიანი გამოვიკვლიეთ. ერთი არის კონტაქტი – სამედიცინო დაწესებულების მძღოლი. 4 არის საბურთალოს კლასტერიდან, სადაც 100-მდე კონტაქტი გამოვიკვლიეთ პირველადი ინფიცირებულის. დანარჩენი 4 შემთხვევა საკარანტინო ზონებიდან გამოვლინდა, მათ შორის ორი არის ტრაილერის მძღოლი. ამიტომ დაიწყო ადგილზე სწრაფი ტესტირება ტრაილერის ყველა მძღოლის, რომელიც შემოდის“, – აღნიშნა ამირან გამყრელიძემ.
მისივე თქმით, ამ ტიპის კვლევები უკვე ყველა სახმელეთო გადასასვლელზე მოქმედებს.
საქართველოში კორონავირუსით კიდევ 26 ადამიანი დაინფიცირდა, 5 კი გამოჯანმრთელდა.
საერთო ჯამში ქვეყანაში კორონავირუსი 783 ადამიანს დაუდასტურდა, აქედან 605 უკვე გამოჯანმრთელდა. საქართველოში კორონავირუსით გარდაიცვალა 12 ადამიანი.
კარანტინის რეჟიმში 2 966 ადამიანი რჩება, სტაციონარში მეთვალყურეობის ქვეშ კი – 250.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.
კომენტარები