საბავშვო ბაღების ავტორიზაციის ვადა 6 წლამდე გაიზრდება – კანონპროექტი

ადრეული და სკოლამდელი აღზრდისა და განათლების დაწესებულებებისთვის ავტორიზაციის ვადა 4-დან 6 წლამდე იზრდება – ამის შესახებ განათლების სამინისტროს მიერ ინიცირებული კანონპროექტში წერია.

განმარტებითი ბარათის მიხედვით, კანონპროექტის მიზანია, ერთი მხრივ, დაწესებულებების ადმინისტრაციული დატვირთვის შემცირება, მეორე მხრივ კი, განათლების ხარისხის განვითარების ეროვნული ცენტრის (NCEQE) რესურსების მაქსიმალური კონცენტრაცია მიმდინარე რეფორმის მიზნებზე, რაც სახელმწიფო ბიუჯეტისთვის მინიმუმ 6 მილიონი ლარის გადანაწილებას გულისხმობს.

ამჟამად მოქმედი კანონმდებლობით, სკოლამდელი აღზრდის დაწესებულებებისთვის ავტორიზაციის ვადა 4 წელია. მიღებული კანონპროექტით, ეს ვადა 6 წლამდე განისაზღვრება, რაც სტანდარტთან შესაბამისობაში მოიყვანს სხვა საგანმანათლებლო საფეხურების ვადებს:

ზოგადსაგანმანათლებლო დაწესებულება: 9 წელი (სწავლის ხანგრძლივობის შესაბამისად).
პროფესიული/უმაღლესი საგანმანათლებლო დაწესებულება: 6 წელი.
ადრეული და სკოლამდელი დაწესებულება (ახალი): 6 წელი.
როგორც პროექტის განმარტებით ბარათშია აღნიშნული, ვადის გაზრდა მიზანშეწონილია იმისთვის, რომ ავტორიზაციის, როგორც გარე ხარისხის უზრუნველყოფის მექანიზმის ეფექტიანობა გაიზარდოს, სწავლის ხანგრძლივობის შესაბამისად.

დოკუმენტის მიხედვითვე, ცვლილება პირდაპირ კავშირშია ადრეული და სკოლამდელი განათლების სისტემის მიმდინარე რეფორმასთან. რეფორმის ფარგლებში, 2029 წლის ბოლომდე საქართველოში არსებულმა 2050-მა დაწესებულებამ უნდა გაიაროს ავტორიზაციის პროცესი.

4-წლიანი ვადის შენარჩუნების შემთხვევაში, NCEQE-ს ყოველწლიურად დაახლოებით 400 ადმინისტრაციული წარმოების ჩატარება უწევდა, რაც მნიშვნელოვან ფინანსურ და ადამიანურ რესურსებთან იყო დაკავშირებული.
6-წლიანი ვადის დაწესება ცენტრს საშუალებას მისცემს, რესურსები კონცენტრირებული იყოს პირველად ავტორიზაციაზე, რათა მიღწეულ იქნეს 2029 წლის ბოლომდე ყველა დაწესებულების ავტორიზაციის მიზანი.
კანონპროექტის მიღება დადებითად იმოქმედებს სახელმწიფო ბიუჯეტის ხარჯვით ნაწილზე, ვინაიდან ავტორიზაციის პროცესი როგორც კერძო, ასევე საჯარო დაწესებულებებისთვის უფასოა და სრულად სახელმწიფო ბარჯგით ფინანსდება.

ერთი დაწესებულების ავტორიზაციისთვის ბიუჯეტიდან საშუალოდ 5,000-7,000 ლარი გამოიყოფა.
ხელახალი ავტორიზაციის ვადის 4-დან 6 წლამდე გაზრდა მინიმუმ 6 მილიონი ლარის გადანაწილების საშუალებას მისცემს ბიუჯეტს 6-წლიან შუალედში, 2029 წლიდან დაწყებული, ნაცვლად 4-წლიანი შუალედისა.