“სააკაშვილს დღევანდელ პროცესზე ჩართვა სურს” – გიული ალასანია

საქართველოს მესამე პრეზიდენტის, მიხეილ სააკაშვილის დედის, გიული ალასანიას ინფორმაციით, სააკაშვილს სურს, რომ დღევანდელ სასამართლო პროცესს დაესწროს.

ამის შესახებ მან მიხეილ სააკაშვილის მონახულების შემდეგ ჟურნალისტებს განუცხადა.

“განწყობილია, რომ ჩაერთოს. უნდა და აპირებს. თუ მისცა ჯანმრთელობის მდგომარეობამ შესაძლებლობა, ჩაერთვება”, – აღნიშნავს ალასანია.

თბილისის საქალაქო სასამართლოში მესამე პრეზიდენტის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლო პროცესი დღეს გაიმართება.

სხდომა თბილისის საქალაქო სასამართლოში 12:30 საათზეა ჩანიშნული.

მიხეილ სააკაშვილის ადვოკატის, შალვა ხაჭაპურიძის განცხადებით, დღევანდელ სასამართლო პროცესზე დაცვის მხარე, სავარაუდოდ, მოწმეების დაკითხვას დაასრულებს.