სააკაშვილის პროცესისა და ივანიშვილისთვის სანქციების დაწესების თაობაზე ანა ფოტიგა ბორელს კითხვებს უსვამს

30 მარტს ევროპის პარლამენტის უსაფრთხოებისა და თავდაცვის ქვეკომიტეტის თავმჯდომარემ, პოლონელმა ევროპარლამენტარმა, ანა ფოტიგამ, განაცხადა, რომ მან ევროკომისიის ვიცე-პრეზიდენტს, საგარეო პოლიტიკის საკითხებში ევროკავშირის უმაღლეს წარმომადგენელს, ჟოზეპ ბორელს, გაუგზავნა წერილი, რომელშიც საქართველოს შესახებ დაუსვა შეკითხვები.

როგორც მან ტვიტერში დაწერა, შეკითხვები ეხებოდა საქართველოს განაცხადს ევროკავშირში წევრობაზე, ევროპულ ღირებულებებს, საქართველოს ექს-პრეზიდენტ მიხეილ სააკაშვილისადმი არასათანადო მოპყრობას და შესაძლო სანქციებს ბიძინა ივანიშვილის წინააღმდეგ.

პოსტს დართული აქვს თავად წერილის ასლი, რომელშიც ევროპარლამენტარი მხარდაჭერას გამოუთქვამს საქართველოს ევროკავშირთან დაახლოების გზაზე. მაგრამ ის შენიშნავს: „გაწევრიანება დამსახურებაზეა დამოკიდებული. ამასთან დაკავშირებით შეშფოთებული ვარ საქართველოს მესამე პრეზიდენტის, მიხეილ სააკაშვილისადმი მოპყრობით, რაც ღრმად ეწინააღმდეგება ევროპულ სტანდარტებსა და ღირებულებებს. ვუერთდები მრავალ მოწოდებას, რომ პრეზიდენტ სააკაშვილს მოეპყრონ სამართლიანად და ღირსებით და თავი შეიკავონ დამამცირებელი მოპყრობისა და პოლიტიკური ანგარიშსწორებისგან.“

ფოტიგას სიტყვებით, მრავალმა ინსტიტუტმა, ექიმმა და დიპლომატმა გამოხატა სერიოზული შეშფოთება სასამართლო პროცესის შესახებ და სააკაშვილის მიმართ არასათანადო მოპყრობის გამო, რაც „წაქეზებულია რუსული კავშირების მქონე ოლიგარქის, ბიძინა ივანიშვილის მიერ, რომელიც არაფორმალურად აკონტროლებს საქართველოს მთავრობას“.

წერილის ავტორი ასევე ახსენებს, რომ ივანიშვილის არაფორმალური კავშირების შედეგია მმართველი პარტია „ქართული ოცნების” მთავრობის ორაზროვანი პოზიცია უკრაინის წინააღმდეგ რუსეთის აგრესიის მიმართ“.

წერილში ფოტიგა საგარეო პოლიტიკის საკითხებში ევროკავშირის ლიდერს მიმართავს ორი შეკითხვით:

„1. შეესაბამება თუ არა საქართველოს მესამე პრეზიდენტის მიმართ პოლიტიკური ანგარიშსწორებისა და არასათანადო მოპყრობის პოლიტიკა ევროპულ ღირებულებებსა და ვალდებულებებს, რაც სავალდებულოა გაწევრიანების პროცესში?

2. ეთანხმება თუ არა ევროკომისიის ვიცე-პრეზიდენტი და საგარეო საკითხებში ევროკავშირის უმაღლესი წარმომადგენელი იმას, რომ მოლდოვის დეოლიგარქიზაციამ დადებითი როლი ითამაშა ამ ქვეყანაში პოლიტიკურ რეფორმებზე და მის მომავალზე ევროკავშირთან დაკავშირებით და იზიარებს თუ არა ის გავრცელებულ მოსაზრებას, რომ რუსული კავშირების მქონე საეჭვო რეპუტაციის ქართველი ოლიგარქისთვის პერსონალური სანქციების დაწესებას მსგავსი დადებითი შედეგი ექნებოდა?“

3 მარტს, უკრაინის კვალდაკვალ, საქართველომ ევროკავშირს მიმართა ოფიციალური განაცხადით ბლოკში გაწევრიანების თაობაზე.