The Insider წერს, რომ გასული წლის განმავლობაში მოწამვლის “ახალ ტალღაში” მოყვნენ ჟურნალისტები და აქტივისტები, რომლებმაც რუსეთი დატოვეს. მედია საკითხთან დაკავშირებით ვრცელ საგამოძიებო მასალას აქვეყნებს.
ოქტომბერში Novaya Gazeta-სა და Meduza-ს ჟურნალისტი, ელენა კოსტიუჩენკო მოწამლეს მიუნხენში, ერთი კვირის შემდეგ “ეხო მოსკვის” ჟურნალისტი, ირინა ბაბლოანი თბილისში, თითქმის იდენტური სიმპტომების წინაშე აღმოჩნდა, ხოლო გაზაფხულზე, ფონდ “თავისუფალი რუსეთის” ხელმძღვანელი, ნატალია არნო მოწამლეს ნეიროტოქსიკური ნივთიერებით.
მოწამვლის შესახებ გარემოებები The Insider-მა განიხილა სხვადასხვა ექსპერტებთან, მათ შორის ქიმიური იარაღის სპეციალისტთან, ათამდე სხვადასხვა სპეციალობის ექიმთან, მათ შორის რუს ექიმებთან, რომელმაც აქტიური მონაწილეობა მიიღეს ალექსეი ნავალნისა და დიმიტრი ბიკოვის რეანიმაციაში.
Эхо Москвы-ს ჟურნალისტი – სავარაუდოდ მოიწამლა თბილისში.
გამოცემა წერს, რომ ირინა ბაბლოიანი მოსკოვიდან თბილისში გასული წლის ოქტომბრის შუა რიცხვებში გადავიდა და სასტუმრო King Tamar-ში ცხოვრობდა. 25 ოქტომბრის საღამოს მან თავი შეუძლოდ იგრძნო, მეორე დილით ძლიერი სისუსტითა და თავბრუსხვევით გაიღვიძა. 26 ოქტომბერს იგრძნო ხელისა და ფეხის გულებს წვა.
“მიუხედავად ამ უცნაური პირველი სიმპტომებისა, ირინამ გადაწყვიტა უარი არ ეთქვა ერევანში მოგზაურობაზე, სადაც 27 ოქტომბრის ღამეს მანქანით წავიდა. მანქანაში ძალიან ცუდად გახდა, გონება დაბინდული ჰქონდა, კონცენტრაციას ვერ ახერხებდა”, – წერს გამოცემა.
ბაბლოანი ყვება, რომ ისეთი შეგრძნება ჰქონდა, თითქოს სხეული მას არ ეკუთვნოდა, დაღლილობის გრძნობა არ ქრებოდა, დაეწყო ძლიერი შფოთვა.
ერევნის სასტუმროში ქალმა მუცლის ძლიერი ტკივილი იგრძნო, ჰქონდა პირღებინება, პირში მეტალის გემო. გამოცემა წერს, რომ ყველა სიმპტომი, გარდა ბოლოსი ძალიან ჰგავს კოსტიუჩენკოს შემთხვევას – ერთი მნიშვნელოვანი განსხვავებით, ირინას აწუხებდა კანზე სიწითლე, პირველ კვირებში ეს ჰგავდა წითელ ლაქებს, შემდეგ კი ჭინჭრის ციებას.
გამოცემის ცნობით, სისუსტე, ტკივილი და უძილობა გაქრა დაახლოებით ორი დღის შემდეგ, სიწითლე კანზე კი კვლავ ჩნდება.
ირინას მაშინვე არ მიუმართავს ტოქსიკოლოგისთვის, რადგან ვერ იფიქრებდა, რომ ვინმეს შეიძლება მოეწამლა, ტესტი გაიკეთა ალერგიაზე (ყველა ცნობილ ალერგენზე უარყოფითი იყო). რამდენიმე თვეში, ბერლინში გადასვლის შემდეგ გაიკეთა ტოქსიკოლოგიური ანალიზი, რომლის პასუხებიც არ მისვლია. კლინიკაში ჟურნალისტს უთხრეს, რომ სისხლის ნიმუში “დაიკარგა”, მასთან მივიდა პოლიცია, რომელმაც გამოკითხა.
The Insider წერს, რომ ცოტა ხნის წინ ირინამ კვლავ ჩააბარა სისხლის ნიმუში, მაგრამ ამდენი ხნის შემდეგ პრაქტიკულად წარმოუდგენელია ტოქსინების კვალის აღმოჩენა.
The Insider-ის მიერ გამოკითხული ექსპერტებისთვის ეგზოგენური/გარეგანი მოწამვლის ვერსია უფრო სავარაუდოა. ელენა კოსტიუჩენკოს მიერ აღწერილი სიმპტომების მსგავსება იძლევა ვარაუდის გაკეთების საშუალებას, რომ შეიძლებოდა მომხდარიყო იგივე ან მსგავსი მომწამვლელი აგენტის გამოყენება, მაგრამ მაინც ძნელი სათქმელია, რომლის, რადგან ირინას შემთხვევაში მწირია სამედიცინო ანალიზების პასუხები.
,,მთავარი არხი”
კომენტარები