“როგორ შეიძლება ეკონომიკა დღეს რუსეთს მიაბა, გვინდა, რომ ქვის ხანას მივებათ და გაღატაკდეს, ან გაუბედურდეს ქვეყანა?” – ასე აფასებს რუსეთის მიერ ქართული რძის პროდუქციისთვის რუსეთის ბაზრის გახსნას ოპოზიციონერი პოლიტიკოსი გიგი უგულავა.
მისი თქმით, ბევრი კომპანიასაქართველოში ამერიკული ფულით არის დაფინანსებული და როგორც კი რუსეთის ბაზარზე შევა, სანქციების ქვეშ მოექცევა.
“ეს არის არა სარგებლიანი, არამედ ზიანის მომტანი ჩვენი საზოგადოებისთვის, როგორც არ უნდა დასრულდეს ომი, ამხელა სანქციების ქვეშ მყოფი რუსეთის ეკონომიკა ვერაფერს ვერ გააკეთებს და ქვის ხანაში იქნება.
რუსულ რუბლში რომ გადაგიხდიან და ამ რუსულ რუბლს ვერსად ვერ გადაახურდავებ “შავი ბაზრის” გარდა, მერე ხომ მიხვდებით, რომ რუსული ბაზრიდან ყველა გარბის? 15-ვე რძის მწარმოებელი კომპანიიდან ზოგმა პატრიოტული მოსაზრება თქვა და ზოგმაც ძალიან პრაგმატული, რუსულ ბაზარზე რომ შეიტან პროდუქტს, იქიდან ფულს ვერ ამოიღებ.
ბევრი კომპანია არის ამერიკული ფულით დაფინანსებული და როგორც კი რუსეთის ბაზარზე შევა, იმწამსვე მოექცევა სანქციების ქვეშ. ამიტომ, როგორ შეიძლება ეკონომიკა დღეს რუსეთს მიაბა, გვინდა, რომ ქვის ხანას მივებათ და გაღატაკდეს, ან გაუბედურდეს ქვეყანა? აქ აღარ არის საუბარი იმაზე, რომ უკრაინის გამარჯვება ჩვენი გამარჯვებაა, ქართულ ბიზნესს ხელს კრავენ უფსკრულისკენ, რადგან რუსულ ბაზარზე შესვლა არის იმ კომპანიების გაწირვა, ვინც აქ მუშაობს“, – აღნიშნა გიგი უგულავამ.
ცნობისათვის, გავრცელდა ინფორმაცია, რომ რუსეთის როსსელხოზნადზორი 15 ქართულ კომპანიას საშუალებას აძლევს, რუსეთში რძე და რძის პროდუქტები შეიტანოს.
გადაწყვეტილება 5 მარტს, როსსელხოზნადზორის ხელმძღვანელის, სერგეი დანკვერტისა და საქართველოს სოფლის მეურნეობის სამინისტროს სურსათის ეროვნული სააგენტოს ხელმძღვანელის, ზურაბ ჩეკურაშვილის შეხვედრის შემდეგ მიიღეს.
გავრცელებულ ინფორმაციასთან დაკავშირებით, სურსათის ეროვნულმა სააგენტომ განცხადება გაავრცელა და აღნიშნა, რომ 2020 წლიდან მოლაპარაკებები მიმდინარეობდა რუსეთის ფედერაციის მხარესთანაც, რომლის საფუძველზე, მიღებულ იქნა გადაწყვეტილება, ქართული ცხოველური წარმოშობის პროდუქციის ექსპორტის დაშვებასთან დაკავშირებით, რუსეთის ფედერაციასა და სხვა ქვეყნებში.
კომენტარები