რუსეთ-უკრაინის კრიზისის გამწვავების ფონზე უმდიდრესი რუსების ქონება მცირდება. საუბარია იმ ადამიანების ქონებაზე, რომლებიც Bloomberg-ის 500 უმდიდრესი ადამიანების სიაში შედიან. ბლუმბერგის ინფორმაციით, წლის დასაწყისთან შედარებით, 23 რუსი მილიარდერის ქონება $32 მლრდ-ით არის შემცირებული და ამჟამად 343 მლრდ დოლარს შეადგენს.
გეოპოლიტიკური დაძაბულობა და დასავლეთის მხრიდან დაწესებული სანქციები პირდაპირ გავლენას ახდენს რუსეთის ეკონომიკაზე. Bloomberg-ის ინფორმაციით, გენადი ტიმჩენკომ მიმდინარე წლის განმავლობაში საკუთარი ქონების მესამედი დაკარგა. გამოცემა წერს, რომ ტიმჩენკო რუსეთის პრეზიდენტის, ვლადიმერ პუტინის მეგობარია. მათივე ინფორმაციით, მისი ქონების უდიდესი წილი გაზის მწარმოებელი რუსული კომპანიის, Novatek-ის წილის ფლობიდან მოდის. Bloomberg-ის 500 უმდიდრესი ადამიანის სიაში ის ამჟამად 10 მილიარდით 118-ე ადგილს იკავებს. აღნიშნულ ჩამონათვალში მითითებულია, რომ ტიმჩენკომ 2022 წლის დასაწყისიდან დღემდე $6,47 მილიარდი დაკარგა.
Novatek-ის აქციონერია ლეონიდ მიხეილსონიც, რომლის ქონებაც მიმდინარე წელს $6,23 მილიარდით შემცირდა. რაც შეეხება ლუკოილის ხელმძღვანელის ვაგიტ ალექპეროვის ქონებას, ის $3,5 მილიარდით არის შემცირებული, რაც ენერგოკომპანიის აქციების 17%-იან კლებას უკავშირდება.
ასეთია ბლუმბერგის უმდიდრესი ადამიანების რეიტინგში შემავალი იმ ადამიანების სია, რომლებიც რუსეთის ფედერაციას წარმოადგენენ:
- ვლადიმირ პოტანინი — ფლობს $29,7 მილიარდს, მისი ქონება მიმდინარე წლის დასაწყისთან შედარებით შემცირებულია $1,18 მილიარდით;
- ალექსეი მორდაშოვი — $27,6 მლრდ, კლება $1,24 მლრდ;
- ვლადიმირ ლისინი — $26,7 მლრდ, კლება $1,3 მლრდ;
- ლეონიდ მიხელსონი — $26,2 მლრდ, კლება $6,23 მლრდ;
- ალიშერ უშმანოვი — $21,6 მლრდ, ზრდა $329 მლნ;
- ვაგიტ ალეკპეროვ — $19,3 მლრდ, კლება $3,48 მლრდ;
- ანდრეი მეილნიჩენკო — $18,4 მლრდ, ზრდა $963 მლნ;
- ვიქტორ ველკსერლბერგი — $17,4 მლრდ, კლება $1,04 მლრდ;
- გენადი ტიმჩენკო — $16 მლრდ, კლება $6,47 მლრდ;
- რომან აბრამოვიჩი — $15,4 მლრდ, კლება $2,58 მლრდ;
- სულეიმან კერომოვი — $14,6 მლრდ, კლება $618 მლნ;
- მიხაილ პროხოროვი — $13,7 მლრდ, კლება $305 მლნ;
- მიხაილ ფრიდმანი — $12,5 მლრდ, კლება $1,47 მლრდ;
- ვიქტორ რაშნიკოვი — $12,4 მლრდ, კლება $1,79 მლრდ;
- დმიტრი რიბოლოევი — $10,8 მლრდ, კლება $233 მლნ;
- ვიაჩესლავ კანტორი — $9,65 მლრდ, ზრდა $621 მლნ;
- გერმან ხანი — $8,51 მლრდ, კლება $997 მლნ;
- ალექსანდერ აბრამოვი — $8,08 მლრდ, კლება $1 მლრდ;
- ანდრეი გურიევი — $7,61 მლრდ, კლება $297 მლნ;
- ლეონიდ ფედუნი — $7,49 მლრდ, კლება $1,43 მლრდ;
- ისკანდარ მახმუდოვი — $6,77 მლრდ, კლება $1,12 მლრდ;
- ალექსეი კუზმიჩევი — $6,4 მლრდ, კლება $764 მლნ;
- პეტრ ავენი — $5,93 მლრდ, კლება $488 მლნ.
როგორც ცნობილია, ვლადიმერ პუტინის მიერ დონეცკისა და ლუგანსკის ოლქების “დამოუკიდებელ რესპუბლიკებად” აღიარების შემდეგ მსოფლიოს არაერთმა ქვეყანამ რუსეთს სანქციები დაუწესა.
ამერიკის შეერთებული შტატების პრეზიდენტის, ჯო ბაიდენის განცხადებით რუსეთზე დაკისრებული სანქციები შეეხება ორ ფინანსურ ინსტიტუტს, სახელმწიფო ვალსა და ელიტარულ ოჯახებს. დიდი ბრიტანეთის მხრიდან დაწესებული სანქციები რუსეთის ხუთ ბანკსა და სამ ოლიგარქს შეეხო. სანქციებს შეუერთდა გერმანიაც, რომელმაც Nord Stream 2-ის სერტიფიცირების პროცესი შეაჩერა. გარდა ამისა, არსებული ინფორმაციით, რუსეთის ფედერაციას სანციები დაუწესა ევროკავშირმა, ავსტრალიამ, კანადამ და იაპონიამ.
კომენტარები