რუსული კომერსანტის ინფორმაციით, რუსეთის ქალაქ ნოვოსიბირსკის სასამართლომ ძერჟინსკის რაიონის პოლიციის დეპარტამენტის ყოფილი უფროსი კაფეში ხინკლის სახით ქრთამის აღებისთვის დამნაშავედ ცნეს. მას 3 წლით თავისუფლების პირობითი აღკვეთა და 4 წლით გამოსაცდელი ვადა მიესაჯა. მედიის ინფორმაციით, პოლიციის მაღალჩინოსანი ალექსადრე გრაშჩენკოვი უფასო კერძების სანაცვლოდ ფართის ქირის პირობების დარღვევაზე თვალს ხუჭავდა.
მედიის ინფორმაციით, სურვილის მიხედვით მას ცხელ საჭმელს სამსახურშიც უგზავნიდნენ. მრავალფეროვანი კერძებიდან ის ხინკალსა და კიტრის სალათს ირჩევდა.
როგორც სასამართლომ დაადგინა, 2015 წლის ოქტომბრიდან 2018 წლის სექტემბრამდე შინაგან საქმეთა დეპარტამენტის უფროსი სისტემატურად იღებდა ქრთამს 3 მეწარმისგან. მას ჯამში 53 000 რუბლის კაფეს პროდუქტები და მომსახურება მიაწოდეს.
გრაშჩენკოვი 2019 წლის თებერვალში დააპატიმრეს. ის შინაპატიმრობაშიც იმყოფებოდა. სასამართლოზე პოლიციის განყოფილების ხელმძღვანელმა დანაშაული აღიარა. სასჯელთან ერთად გრაშჩენკოვს 3 წლის განმავლობაში სამართალდამცავ ორგანოებში თანამდებობის დაკავებაც აეკრძალა.
კომენტარები