ბრიტანელები არ უნდა გაემგზავრონ უკრაინაში საბრძოლველად, სჯობს ამის ნაცვლად ყველაფერი გააკეთონ უკრაინელების დასახმარებლად ბრიტანეთიდან. ამის შესახებ BBC-სთან ინტერვიუში ბრიტანეთის შეიარაღებული ძალების მეთაურმა, ადმირალმა სერ ტონი რადაკინმა განაცხადა.
„ძალიან მკაფიოდ განვმარტეთ, რომ უკანონო იქნება თუ დიდი ბრიტანეთის სამხედროები და მოსახლეობა უკრაინაში დაიწყებენ გამგზავრებას. მხარი დაუჭირეთ უკრაინას ბრიტანეთიდან, ყველაფრით, რითიც შეგიძლიათ. საუბარია აზრიან მხარდაჭერაზე, რომელიც შეგიძლიათ ბრიტანეთიდან გაუწიოთ“, – განაცხადა რადაკინმა.
მისივე თქმით, უკრაინის ცის არასაფრენ ზონად გამოცხადება უკრაინას ტაქტიკურად ვერ დაეხმარა და საბრძოლო მოქმედებების ესკალაციას გამოიწვევს. ადმირალმა აღნიშნა, რომ დასავლეთი „სწორად იქცევა“.
რადაკინის თქმით, „რუსეთის შეჭრა უკრაინაში სრულდება, რუსეთი ძალას კარგავს და ეს დიდხანს არ გაგრძელდება. რუსული ჯარები დიდ ზარალს განიცდიან, მათი მორალი ეცემა და ტექნიკა ფუჭდება. ასე რომ, ჯარისკაცების ნაწილმა მიატოვა კოლონა და კიევის მახლობლად ახლომდებარე ტყეში დაბანაკდა“- აღნიშნა რადკინმა.
რადაკინმა ასევე აღნიშნა, რომ უკრაინაში ნგრევის უმეტესი ნაწილი საარტილერიო დაბომბვამ გამოიწვია და არა საჰაერო დაბომბვამ. მისი თქმით, ცის ჩაკეტვა უკრაინის თავზე ნიშნავს რუსული საჰაერო თავდაცვის სისტემების და თვითმფრინავების განადგურებას, რაც მაშინვე გამწვავებას გამოიწვევს.
კომენტარები