გასულ ღამეს რუსეთის რეგიონებს უპილოტო საფრენი აპარატებით შეუტიეს. სამიზნე როსტოვის ოლქი და მოსკოვის მიდამოები იყო, — წერს „მედუზა“.
როსტოვის ოლქში დრონებმა დაარტყეს აზოვის, მილეროვოსა და ტარასოვის რაიონებს. ოლქის გუბერნატორის ინფორმაციით, დასახლებულ პუნქტ დოლოტინკაში დრონი საცხოვრებელ სახლს დაეცა, რასაც მშვიდობიანი მოქალაქე ემსხვერპლა.
გარდა ამისა, აზოვში მძიმედ დაზიანდა მრავალბინიანი სახლი — განადგურდა სახურავი და შენობიდან 120 ადამიანი იქნა ევაკუირებული. გუბერნატორის განცხადებით, კიდევ ერთი დრონის ნამსხვრევები სპორტულ სტადიონზე ჩამოვარდა. ქალაქ შახტებში თავდასხმის შედეგად ელექტროენერგიის გარეშე დარჩა 6000 ადამიანი. ამასთან, ტელეგრამ-არხები წერენ, რომ აზოვში შეტევის მიზანი აზოვის ოპტიკურ-მექანიკური ქარხანა იყო. სოციალურ ქსელებში ვრცელდება აფეთქებებისა და ხანძრის ამსახველი ვიდეოკადრები.
მოსკოვის ოლქში დრონით თავდასხმის სამიზნე გახდა სერგიევ პოსადი, სადაც აფეთქების შემდეგ ცეცხლი წაეკიდა ქვესადგურს. შედეგად, რამდენიმე მიკრორაიონი ელექტროენერგიის გარეშე დარჩა.
კომენტარები