რუსეთის საგარეო საქმეთა მინისტრის მოადგილე მიხაილ გალუზინი ამბობს, რომ რუსეთი მზად არის საქართველოსთან “ჯანსაღი პრაგმატული თანამშრომლობის განვითარებისთვის იმ საკითხებში, რომელიც ორივე ქვეყნისთვის მომგებიანია”.
“ჩვენ მზად ვართ თბილისთან ორმხრივი ნორმალიზაციის გზას გავყვეთ. ასე რომ, ზოგადად, თბილისზეა დამოკიდებული, თუ რა ქმედებებს გააგრძელებს”, – ამბობს მიხაილ გალუზინი გამოცემა იზვესტიასთან.
გამოცემა ასევე აქვეყნებს რუსეთის ფედერაციის საბჭოს საერთაშორისო ურთიერთობების კომიტეტის თავმჯდომარის გრიგორი კარასინის განცხადებას, რომელმაც თქვა, რომ რუსეთ-საქართველოს ურთიერთობები “ინტენსივობისკენ მიისწრაფვის”.
გრიგორი კარასინმა თქვა, რომ მოსკოვი საქართველოსთან დიპლომატიური ურთიერთობების აღდგენას მიესალმება და ამით “მოხარული იქნება”.
დღეს აგვისტოს ომთან დაკავშირებით განცხადება გაავრცელა რუსეთის საგარეო საქამეთა სამინისტროს წარმომადგენელმა მარია ზახაროვამაც და კრემლის ჩვეული, პროპაგანდისტული რიტორიკა გაიმეორა.
მარია ზახაროვას თანახმად, აუცილებელია საქართველომ ოკუპირებული აფხაზეთის და ცხინვალის რეჟიმებთან ძალის გამოუყენებლობის შესახებ ხელშეკრულება დადოს.
ამასთან, ის იწონებს ქართული ოცნების მთავრობის განცხადებებს და აცხადებს, რომ “ბოლო წელს ქართული ხელისუფლების მიერ სამხრეთ ოსეთის წინააღმდეგ მიხეილ სააკაშვილის აგრესიის აღიარება, ასევე აფხაზებთან და ოსებთან შერიგების აუცილებლობის შესახებ გაკეთებული განცხადებები – მოლაპარაკებების წინსლივს იმედს იძლევა”.
კომენტარები