“საგარეო საქმეთა მინისტრმა ზალკალიანმა შემოგვაპარა ქვეყნის ინტერესებისათვის მეტად საზიანო იდეა-ოკუპანტ რუსეთთან ერთად ე.წ. “სამს პლუს სამ” ( რუსეთი, თურქეთი, ირანი, აზერბაიჯანი, სომხეთი, საქართველო) უსაფრთხოების ფორმატში მონაწილეობა.” – წერს სოციალურ ქსელში პარლამენტის დეპუტატი “ნაცმოძრაობიდან” რომან გოცირიძე.
რომან გოცირიძე, საგარეო საქმეთა მინისტრის დავით ზალკალიანის თანამდებობიდან გათავისუფლებას ითხოვს. საზოგადოებამ არ უნდა აპატიოს მას ეს თავხედური “სითამამე”, პერსონალურად უნდა აგოს პასუხი და დაუყოვნებლივ უნდა დატოვოს დაკავებული თანამდებობა. ეს “ჩუმჩუმელა” ჩინოვნიკი არანაკლებ (მეტიც კი) დამნაშავეა, ვიდრე ხელისუფლების ის წარმომადგენლები, რომლებიც აგრესიულობით და სიძულვილით გამოირჩევიან.
იტყვიან ხოლმე, მინისტრის ან რომელიმე თანამდებობის პირის გადადგომის მოთხოვნას რა აზრი აქვს, როცა “იგი წავა და სხვა მოვა”, თავი და თავი ხომ ივანიშვილიაო? ასეთი მიდგომა არის საფუძველშივე მცდარი. ივანიშვილი თავიც არის და ბოლოც და მისი პასუხისმგებლობა განუზომლად დიდია, ვიდრე მისი მორჩილი მინისტრებისა, მაგრამ ეს სულაც არ გამორიცხავს კონკრეტული პირის საჯაროდ მხილებას, მის შერცხვენას, მასზე პირადი პასუხისმგებლობის დაკისრებას.” – წერს რომან გოცირიძე.
ცნობისთვის, საქართველოს პრემიერ-მინისტრი ირაკლი ღარიბაშვილი სამუშაო ვიზიტით სომხეთის რესპუბლიკაში იმყოფებოდა. სამუშაო ვიზიტის ფარგლებში საქართველოს მთავრობის მეთაური სომეხ კოლეგას ნიკოლ ფაშინიანს შეხვდა.
მხარეებმა განიხილეს “სამხრეთ კავკასიაში სამეზობლოს მშვიდობიანი ინიციატივა”, რომლითაც, რეგიონში მშვიდობისა და სტაბილურობის უზრუნველსაყოფად, საქართველოს პრემიერ-მინისტრი ირაკლი ღარიბაშვილი გაეროში გამოვიდა. აღინიშნა, რომ ახალი სამშვიდობო ფორმატი ხელს შეუწყობს მშვიდობიანი კეთილმეზობლური ინიციატივის პერსპექტივებზე მსჯელობას, რომელშიც, სამხრეთ კავკასიის სახელმწიფოებთან ერთად, საერთაშორისო პარტნიორებიც ჩაერთვებიან.
სწორედ ეს ინიციატივა არ მოსწონს რომან გოცირიძეს.
კომენტარები