“ამგვარი “სპეც-ოპერაციებისთვის” საჭირო ჯგუფები ჩვენ უკვე ვიხილეთ 5 ივლისს”, – ასე ეხმაურება სოციალურ ქსლში ყაზახეთში მიმდინარე მოვლენებს და ქვეყანაში რუსეთის ჯარის შესვლას, მწერალი და ანალიტიკოსი ლაშა ბუღაძე.
“ალბათ, ესეც უნდა გვესმოდეს, რომ პუტინი დიდ ომებში შესვლას ფრთხილობს… ის კაგებეს ოფიცერია, ესე იგი, სპეც-ოპერაციების ოსტატია. ყირიმი – სპეც-ოპერაციაა. ყაზახეთიც ასე ჩანს. ხალხის გულწრფელ უკმაყოფილებას გაურკვეველი ჯგუფები შეერივნენ, რომელთაც სროლა და მოროდიორობა დაიწყეს. და აი, რუსული ჯარიც უცებ “იქვე” აღმოჩნდა – რუსული აგენტურის მოხმობით ყაზახეთის სუსტი ხელისუფლებისგან…
ამგვარი “სპეც-ოპერაციებისთვის” საჭირო ჯგუფები ჩვენ უკვე ვიხილეთ 5 ივლისს.
ამიტომ როგორც ერთი დინჯი კაცი იტყოდა: “ფრთხილად ვიყოთ, ფრთხილად ვიყოთ“
ლურჯი ვეფხვის წელია მაინც… ლურჯი კია კარგი ფერი, მაგრამ ვეფხვი არ გამოირჩევა მაინც და მაინც დიდი სიმშვიდით,” – წერს ლაშა ბუღაძე.
ცნობისათვის, ყაზახეთის ხელისუფლებამ 4 იანვარს თხევადი აირის ფასის მნიშვნელოვანი ზრდის შესახებ განაცხადა, რასაც ჯერ მანგისტაუს რეგიონში, შემდეგ კი მთელ ქვეყანაში საპროტესტო აქციები მოჰყვა. მასშტაბური დემონსტრაციების ფონზე ყაზახეთის პრეზიდენტმა ყასიმ-ჟომართ თოყაევმა მთავრობის გადადგომის გადაწყვეტილებას მოაწერა ხელი. ამის მიუხედავად საპროტესტო აქციები ქვეყანაში კვლავ გრძელდება. პროტესტმა უკონტროლო ხასიათი მიიღო.
კომენტარები