საგარეჯოს ცენტრში სპეცოპერაცია დასრულებულია ადგილზე ამ დროისთვის საგამოძიებო მოქმედებები მიმდინარეობს. ექსპერტ-კრიმინალისტები შემთხვევის ადგილიდან ნივთმტკიცებებს იღებენ.
თავდამსხმელი, ნოდარ ათუაშვილის ცხედარი ჯერ ექსპერტიზის ეროვნულ ბიუროში გადასვენებული არაა. მთელი ღამის განმავლობაში ადგილზე მუშაობდნენ გამნაღმველებიც, რადგან ათუაშვილს სახლში ასაფეთქებელი ნივთიერება ჰქონდა, აღნიშნული მოგვიანებით შს მინისტრმაც დაადასტურა.
შემთხვევის შედეგად დაღუპულია 5 ადამიანი, მათ შორის ერთი პოლიციელი. დაჭრილია 5 პირიც, მათ შორის ერთის მდგომარეობა განსაკუთრებით მძიმეა. ერთ-ერთი დაშვებული თბილისში გადაიყვანეს.
“ექვსი ავადმყოფი იქნა ცეცხლსასროლი ჭრილობით შემოყვანილი კლინიკაში, მათ შორის ერთი არის გარდაცვლილი. 5-ის მდგომარეობა ამ ეტაპისთვის სტაბილურად მძიმეა, 4-ს გაეწია ჭრილობების შესაბამისი ქირურგიული დამუშავება, ერთ პაციენტთან ამ ეტაპისთვის მიმდინარეობს ქირურგიული ჩარევა. ერთი პაციენტი მსუბუქი ტრავმით გადაყვანილია თბილისის სპეციალიზირებულ კლინიკაში. სამი პაციენტის მდგომარეობა სტაბილურადაა, ერთი პაციენტის მდგომარეობა შედარებით კრიტიკულადაა, რომელსაც უგრძელდება ოპერაციული მკურნალობა ამ ეტაპისთვის”, – ამბობს ექიმი.
ცნობისთვის, 20 იანვარს ღამით საგარეჯოში, შეიარაღებულმა პირმა, ერთ-ერთი საცხოვრებელი კორპუსის აივნიდან მოქალაქეებს ავტომატით ცეცხლი გაუხსნა. შინაგან საქმეთა სამინისტროს ინფორმაციით, დაიღუპა 5 ადამიანი, მათ შორის ერთი პოლიციელი. დაჭრილია კიდევ 5 ადამიანი, მათ შორის ერთის მდგომარეობა მძიმეა.
კომენტარები