სატურაცია სისხლის ჟანგბადით გაჯერების მაჩვენებელია. კორონავირუსული ინფექციის ერთ-ერთი მთავარი გართულება ვირუსული პნევმონიაა, რომლის მძიმე მიმდინარეობისას მკვეთრად ქვეითდება სისხლის ჟანგბადით გაჯერების მაჩვენებელი ანუ სატურაცია
ინფექციონისტი, მაია ბუწააშვილი, სოციალურ ქსელში, წერს:
„პულს ოქსიმეტრი კოვიდის პანდემიისას აქტიურად გამოყენებადი ხელსაწყო გახდა.
მისი მნიშვნელობა მართლაც დიდია, რადგან სახლში მყოფი პაციენტის სუნთქვის უკმარისობის შეფასების ერთ-ერთი რეალური საშუალებაა.
ზოგჯერ ჰოსპიტალიზაციის საჭიროება ამით განისაზღვრება ხოლმე, რადგან სატურაციის დაბალი ციფრები ჟანგბადის მიწოდების აუცილებლობას გვიჩვენებს.
ხშირად პაციენტებს აქვთ „ჰაერის უკმარისობის“ შეგრძნება, თუმცა რეალურად სატურაცია ნორმაში აქვთ.
ასევე პირიქით, ზოგიერთ ადამიანს შეიძლება სატურაცია მკვეთრად ჰქონდეს შემცირებული, მაგრამ ამას საერთოდ ვერ გრძნობდეს.
რადგან სატურაციის მაჩვენებელი ასეთ მნიშვნელობას იძენს (კიდევ ვიმეორებ, ხშირად ჰოსპიტალიზაციის საკითხი ამით წყდება ხოლმე), მნიშვნელოვანია, გაზომვა სწორად მოხდეს.
კვლევებმა გამოავლინა ის ფაქტორები, რომლებიც გავლენას ახდენენ სატურაციის გაზომვის სიზუსტეზე:
- გაზომვა უნდა მოხდეს მოსვენებულ მდგომარეობაში. პაციენტი მშვიდად უნდა სუნთქავდეს გაზომვამდე რამდენიმე წუთის განმავლობაში და გაზომვისას არ მოძრაობდეს.
- ნუ დავეყრდნობით პირველივე ციფრს, რომელიც გამოისახება მონიტორზე. ზოგჯერ ეს ციფრი იცვლება, ამიტომ შედეგის წაკითხვამდე დავიცადოთ 30-60 წამი და ეს ციფრი მივიღოთ მაჩვენებლად.
- ერთჯერადად გაზომილ სატურაციის მაჩვენებელს დიდი მნიშვნელობა არა აქვს. გაზომვა უნდა მოხდეს დღეში რამდენჯერზე და ყურადღება გამახვილდეს კლებად დინამიკაზე. ამიტომ სასწრაფო დახმარების ბრიგადის მიერ ერთჯერადად გაზომილი მაჩვენებლით არ უნდა წყდებოდეს ჰოსპიტალიზაციის საკითხი.
- სატურაციის გაზომვისას ფრჩხილის ლაკი მოცილებული უნდა იყოს, რადგან ლაკი სინათლის შთანთქმას იწვევს და შეიძლება არასწორი მაჩვენებელი მივიღოთ.
- ხელსაწყოს მოთავსება შეიძლება საჩვენებელ, შუა და არა-თითებზე, ასევე ფეხის ცერა თითზე და ყურის ბიბილოზე, თუმცა ეს უკანასკნელი ნაკლებად ზუსტ მაჩვენებელს იძლევა.
- გაზომვისას თითი უნდა იყოს თბილი.
- კანის მომატებული პიგმენტაციის დროს მაჩვენებელი შეიძლება იყოს არაზუსტი.
კომენტარები