პრემიერის ყოველი ბრიფინგის შემდეგ, “ალიაში” უწყვეტად შემოდის მოქალაქეთა ზარები და მათ ორი კითხვა აქვთ:
- როდის დასრულდება კომენდანტის საათი და რატომ არ შეუძლია საღამოს 21 საათის მერე სახლიდან გასვლა – რა პრინციპია?
- როდის აღდგება საზოგადოებრივი ტრანსპორტი – მეტრო, ავტობუსები, როდემდე იაროს ადამიანმა ტაქსით აუცილებელ საქმეზე?
ყველას, ვინც “ალიას” დაურეკა, პრემიერის ბრიფინგი უკვე მოსმენილი აქვს და ნანახი – მაგრამ, გვეუბნებიან, რომ არ უჯერებენ ყურს და თვალს, ჰგონიათ, რომ გამორჩათ ის მომენტი, სადაც პრემიერმა გახარიამ კომენდანტის საათის მოხსნაზე, საზოგადოებრივ ტრანსპორტზე ისაუბრა. “გადავახვიეთ რამდენჯერმე და მართლა არაფერი უთქვამს?”, “იქნებ, მერე თქვა?”, “იქნებ, ჟურნალისტებს მოგწერათ?”- გვეკითხებიან.
კი, მართლა არ უპასუხა თქვენი ორი კითხვიდან არც ერთს პრემიერმა.
როდის მოიხსნება კომენდანტის საათი და როდის აღდგენა საზოგადოებრივი ტრანსპორტი?
პრემიერმა არ იცის!
მერიამ არ იცის!
ამირან გამყრელიძემაც კი არ იცის!
ჩემი მეზობელი, შმმ პირი, ე.წ. “სტაიანშიკად” მუშაობდა “კარფურთან” – აუკრძალეს დგომა, არც სტრანსპორტია რომ მივიდეს მაღაზიამდე – “კარფური” არ დაკეტილა, უამრავი მომხმარებელი ჰყავს – ჩემი მეზობელი კი სახლში ზის და საჭმლის ფული არა აქვს, წიწიბურას იხარშავს ხოლმე და მაკარონს – რასაც მივაწვდით, იმის იმედადაა…
ხო, ვერც იმ თვითდასაქმებულთა პროგრამაში მოხვდა.
ყოველ დილით მეკითხება – როდის აღდგება საზოგადოებრივი ტრანსპორტი? როდის მოიხსნება შეზღუდვები? როდემდე უნდა იჯდეს სახლში?
სამწუხაროდ, მიწევს ვუთხრა, რომ:
პრემიერმა არ იცის!
მერიამ არ იცის!
ამირან გამყრელიძემაც კი არ იცის!
იციან და გეგმაში გაწერილი აქვთ, როდის გაიხსნება რეტორანი, სასტუმრო, როდის გაიხსნება კაზინო და გასართობი დაწესებულებები, როდის გაიხსნება დიდი მაღაზიები – ყველაზე სასაცილო ისაა, რომ ისიც კი იციან, როდის გაიხსნება ცა და დაიწყება ფრენები – მაგრამ, აი, საზოგადოებრივ ტრანსპორტზე და კომენდანტის საათზე არაფერი იციან.
“ალია” თქვენთან ერთად, კიდევ ერთხელ ეკითხება პრემიერს:
როდის მოიხსნება კომენდანტის საათი და როდის აღდგება საზოგადოებრივი ტრანსპორტის მუშაობა, ბატონო გიორგი?
ალია
კომენტარები