გუშინწინ შემოვიდა პირველი 25 000 დოზა გრიპის საწინააღმდეგო 4-ვალენტიანი ვაქცინის, რომელიც ფრანგული წარმოებისაა და დღეს უკვე განაწილდა თბილისსა და რეგიონებში. სახელმწიფოს 135 000 ვაქცინაზე აქვს კონტრაქტი და დანარჩენი 110 000 დოზა 23 ოქტომბრის კვირაში შემოვა, – ამის შესახებ დაავადებათა კონტროლის ცენტრის დირექტორმა, ამირან გამყრელიძემ საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა.
მისივე თქმით, ეს 25 000 დოზა პირველ ეტაპზე მაღალი რისკ-ჯგუფებისთვისაა განკუთვნილი.
„ესენი არიან პირველ რიგში, ორსულები, მოხუცთა და ბავშვთა სახლის ბინადრები, ბაგა-ბაღების პედაგოგები და მომვლელი პერსონალი. ასევე, შიდსიანი და ჰეპატიტიანი ავადმყოფები, რომლებიც მკურნალობაზე იმყოფებიან. ამასთან, დიალიზიანი პაციენტებიც. ანუ, სანამ დიდი პარტია შემოვა, აიცრებიან ეს ჯგუფები. შემდგომ უკვე, აიცრებიან დანარჩენი რისკ-ჯგუფები. ესენი არიან: სამედიცინო პერსონალი, დიაბეტიანი პაციენტები, ასევე სხვა ქრონიკული დაავადების მქონე პირები“- განაცხადა ამირან გამყრელიძემ.
მისივე თქმით, სახელმწიფო აქტიურად მუშაობს იმისთვის, რომ დამატებით კიდევ 100 000 ვაქცინის მობილიზება მოხდეს.
კომენტარები