“რელე”, რომელმაც არ იმუშავა – არსებობს, თუ არა, ვაკის პარკის შადრევნის უსაფრთხოების დასკვნა?

თბილისის მერიის გარემოს დაცვის სამსახურის ხელმძღვანელმა თქვა, რომ ექსპლუატაციაში გაშვებამდე შადრევანი “შემოწმებულიც იყო და დაექსპერტებულიც”.

“რადიო თავისუფლება” წერს, რომ ვაკის პარკში შადრევნების რეაბილიტაციის დაწყებიდან დასრულებამდე სატენდერო დოკუმენტაციაში 6 ინსპექტირების ანგარიშია ატვირთული და ყველა მხოლოდ სამუშაოს მოცულობისა და ღირებულების სიზუსტეს ეხება.

მერიასა და კონტრაქტორი კომპანია, “გრინსერვის+”- ს შორის 2021 წლის ოქტომბერში გაფორმებულ ხელშეკრულებაში ნათქვამია, რომ ტექნიკური ზედამხედველობა ვაკის პარკში მიმდინარე სამუშაოებისთვის თბილისის მუნიციპალურ ლაბორატორიას უნდა გაეწია – ამ კომპანიის მიერ მომზადებული დოკუმენტები სატენდერო დოკუმენტაციას არ ახლავს.

თბილისის მერიის დაქვემდებარებაში მყოფი ლაბორატორიის დასკვნები სხვა ორი შემმოწმებელი კომპანიის, სამშენებლო ექსპერტიზის ბიუროსა და მშენ-ექსპერტის მიერ მომზადებულ ინსპექტირების ანგარიშებს აქვს დართული. ამ დოკუმენტების მიხედვით, ვაკის პარკში შადრევნის სარეაბილიტაციო სამუშაოები უნაკლოდ – “პროექტის, სტანდარტების, სამშენებლო ნორმებისა და წესების შესაბამისად არის შესრულებული და პასუხობს მიმღების მოთხოვნებს”.

მერიისა და “გრინსერვის +”-ს შორის გაფორმებული ხელშეკრულებით, მერია კონტრაქტორი კომპანიის მიერ სამშენებლო სამუშოების ჩაბარებისას უნდა დაეყრდნოს სამხარაულის ექსპერტიზის ბიუროს, ან სხვა აკრედიტებული კომპანიის/ექსპერტის მიერ გაცემულ დასკვნას. ვაკის პარკის შადრევნის შემთხვევაში სამხარაულის ექსპერტიზის ბიუროს დასკვნა არ მოუმზადებია, ისინი მხოლოდ უბედური შემთხვევის შემდეგ ჩაერთნენ საგამოძიებო პროცედურებში.

როგორც “მშენ-ექსპერტის” დირექტორი ამბობს მედიასთან, ხარისხის შემოწმება მათი ამოცანა არ ყოფილა და დასკვნა თბილისის მუნიციპალური ლაბორატორიის მანამდე მომზადებული დასკვნების, ანუ იმ დოკუმენტების საფუძველზე შეადგინეს, სადაც ეწერა რომ სამუშაოები “პროექტის, სტანდარტების, სამშენებლო ნორმებისა და წესების შესაბამისად არის შესრულებული”.

“მე დავადასტურე მხოლოდ ღირებულება – რა დაიხარჯა. ზედამხედველობა ჩემი არ იყო. ზედამხედველობა თბილისის მერიის ლაბორატორია უწევდა – ფარულ სამუშაოებს, შიგნით რა ჩაიდო და როგორ გაკეთდა. მე ვადასტურებდი ხარჯვით ნაწილს. ხარისხთან მე შეხება არ მქონდა – პასუხისმგებელი თბილისის ლაბორატორიაა… სამშენებლო ნორმები და წესები, რაც წერია ნიშნავს, რომ ხარჯვითი ნორმები როგორია, მაგალითად ბეტონი რამდენი სჭირდება.

თბილისის ლაბორატორია მიგზავნიდა ფარული სამუშაოების აქტებს, რომელსაც მე ვეყრდნობოდი. შიგნით რა კაბელი და რა ტიპის არის ჩადებული, მე ხომ არ მინახავს, მე ვეყრდნობოდი აქტებს. ხარჯვით ნაწილს, რაც ჩანდა ზედაპირულად – სანათები ეყენა თუ არა და რამდენი, დანადგარი ეყენა თუ არა – ფასი დავადგინე იყო თუ არა დახარჯული” – ამბობს კომპანია მშენ-ექსპერტის დირექტორი, ნუგზარ ქიტიაშვილი.

13 ოქტომბერს, იმ დღეს, როცა შადრევანში დენის დარტყმის შემდეგ 13 წლის ბავშვი გარდაიცვალა, მერიის გარემოს დაცვის სამსახურის უფროსმა, გიგა გიგაშვილმა მედიას უთხრა, რომ შადრევანი “შემოწმებულიც არის და დაექსპერტებულიც. ჩვენ ჩავიბარეთ ექსპერტიზის საფუძველზე. აკრედიტებულმა ექსპერტიზის ბიურომ ჩაიბარა, რომლის სახელიც არ მახსოვს ზეპირად”, – და დაამატა, რომ ოფიციალურ გახსნამდე არაერთხელ იყო სატესტო რეჟიმში ჩართული და მას როგორც ჩართულს, ასევე გამორთულს, რეგულარულად წმენდენ მერიის შესაბამისი სამსახურის თანამშრომლები.

29 აგვისტოთი დათარიღებულ საექსპერტო დასკვნაში, რომელიც 533 გვერდიანი დოკუმენტია, ჩანს რომ სატესტო რეჟიმში ამოწმებდნენ ვაკის პარკის შადრევნების სისტემას, თუმცა ძირითადად მოწმდებოდა წყლის ჭავლის მიწოდება.

ამ დასკვნაშივე ვხვდებით დოკუმენტებს, რომლებიც სამშენებლო პროცესში გამოყენებული მასალების, მათ შორის დენის სადენების, წყალქვეშა განათების სისტემების ხარისხს აფასებს. აქვეა ასევე დაბალი ძაბვის კაბინეტის ინსპექტირებისა და ტესტირების ამსახველი ჩანაწერები და ფოტომასალა.

მერიისა და გრინსერვისს + -ს შორის გაფორმებული ხელშეკრულებით, 2022 წლის 26 აგვისტოს შემდეგ, ანუ როცა მხარეებმა მიღება-ჩაბარების აქტს მოაწერეს ხელი, ვაკის პარკის შადრევნებზე პასუხისმგებელი თბილისის მერია გახდა.

“ძალიან ბევრი ობიექტი გვაქვს ქალაქში და უსაფრთხოებასთან დაკავშირებული პრობლემები არსად გვქონია. ამ შემთხვევაშიც, გათვალისწინებული იყო კონკრეტული „რელე“, რომელსაც უნდა ემუშავა ძაბვის ცვალებადობის დროს. ახლა გამოძიების საგანია, რატომ არ იმუშავა ამ ხელსაწყომ“, – უთხრა დღეს მერის მოადგილემ, ანდრია ბასილაიამ ჟურნალისტებს.